Prezıdentter kortejin bastap júretin polıtseı: Rıza bolǵan Rım papasy medal taqty
ASTANA. KAZINFORM — Elordaǵa kelgen memlekettik deńgeıdegi qonaqtardyń resmı kortejin ádette appaq mototsıkl mingen, minsiz jaraqtanǵan polıtseıler bastap júredi. Olar — Patrýldik polıtsııa mamandandyrylǵan batalonynyń eskort vzvody. Bólimsheni bes jyldan beri polıtsııa podpolkovnıgi Rınat Sálimgereev basqarady. Polıtsııa kúnine oraı Kazinform tilshisi onyń kezekshiligine birge shyǵyp, jumysymen tanysty.
Podpolkovnıtiń aıtýynsha, mundaı qyzmette bos ýaqyt az.
— Men bul salada qyzmet etýdi bala kezimnen armandadym, ákemniń izin qýǵym keldi, — dep bastady sózin Rınat Sálimgereev.
Keıipkerimizdiń ákesi de bir kezde ákimshilik polıtsııa júıesinde qyzmet atqarǵan. Búginde zeınetker bolsa da, kólik qujattary salasynda eńbek etip júr.
2011 jyly Semeı qalasynda polıtsııa qataryna qosylǵan Rınat Sálimgereev 2014 jyly Astanaǵa aýysyp, mamandandyrylǵan jeke batalonǵa qabyldanady. Al 2015 jyldan bastap eskort vzvodynyń ınspektory qyzmetin atqaryp keledi. Bul salany tańdaýyna bala kezinen mototsıklge degen qumarlyǵy sebep bolǵan.
— Mototsıkl aıdaý ár ınspektordyń qolynan kele bermeıdi. Ol tórt dóńgelekti kólik emes, aýa raıynyń qolaısyzdyǵy, kóktaıǵaq sekildi jaǵdaılar qaýipti arttyrady, — dep túsindirdi ofıtser.
Jyldar boıy jınaqtalǵan tájirıbe men eńbektiń arqasynda tártip saqshysy 2020 jyly vzvod komandıri bolyp taǵaıyndalǵan.
Búginge deıin ol 200-den astam mańyzdy is-sharanyń kortejin bastap júrgen. Vzvodtyń negizgi paryzy — resmı delegatsııalar men shet elder basshylarynyń saparyn qorǵaý, jol bastaý. Bul jumysqa arnaıy jabdyqtalǵan 14 mototsıklısten turatyn quram shyǵady, oǵan qosa eki jeke quram qajet bolǵan jaǵdaıda olardy almastyrýǵa daıyn turady.
— Prezıdent kele jatqan kezde bizdi arnaıy daıyndyqqa bosatady. Jattyǵý alańyna baramyz. Kenetten dóńgelek jarylyp qalsa, ne isteý kerektigin, marshrýtty qalaı jedel ózgertýdi úıretemiz, — dep baıandaıdy komandır.
Rınat Sálimgereev óz tájirıbesinde kezdesken bir oqıǵany aıtyp berdi. Bir joly shetel prezıdentiniń kortejimen bir mezette óz elimizdiń Prezıdentiniń korteji de qatar kelip qaldy. Sol sátte eskort quramy aldyńǵy sapta turyp qaldy da, kortejdi tolyq toqtatý múmkindigi bolmaı qaldy.
— Kortejdi tolyq toqtatpaı, baıaý júrip kele jatqandaı kórinýge tyrystyq. Áriptester arasynda kimge jol berýimiz kerek dep, sál abyrjyp qalǵandary da boldy. Biraq birinshi kezekte óz elimizdiń Memleket basshysyna jol berý kerek dep sheshtik, — deıdi ol sol sátti eske túsirip.
Onyń qyzmetindegi esinde qalǵan sátteriniń biri — Rım Papasynyń sapary. Aeroportqa shyǵaryp salǵannan keıin, josparda bolmasa da, ol mototsıkl mingen polıtseılermen qoshtasýǵa arnaıy burylǵan. Sol joly Rım papasy barlyq on tórt ınspektorǵa jeke-jeke medal tabys etken.
Qyzmettiń óz aýyrtpalyǵy baryn Rınat Sálimgereev jasyrmaıdy. Jumys tynymsyz, ár kúni eldiń tynyshtyǵyn kúzetýmen ótedi. Alaıda onyń paıymynsha, bul salanyń jas býynǵa qajetti qasıetteri — shydamdylyq, tózim, psıhologııalyq jáne fızıkalyq turǵyda daıyn bolý.
— Halyqpen jumys istegende sypaıylyq pen shydamdylyq kerek. Ózińdi basqa qyrynan kórsetýińe bolmaıdy, — deıdi ofıtser.
Qyzmetkerlerdiń jaýapkershiligi resmı kortejdermen shektelip qalmaıdy. Olar sonymen qatar qaladaǵy jol-kólik oqıǵalaryn tirkep, túngi reıdterge qatysady, moped pen elektrovelosıped ıelerimen profılaktıkalyq áńgime júrgizedi.
— Mektepterge jol júrý erejesin úıretetin pán engizý qajet dep esepteımin, onda erejeni tek júrgizýshi ǵana emes, jolǵa qatysy bar ár adam bilýi tıis ekeni úıretilýi kerek, — deıdi ol.
Otbasy — onyń basty tiregi. Rınat Sálimgereev úsh qyz tárbıelep otyr, al úlken qyzy Toǵjan da bolashaqta áke jolyn jalǵaýdy armandaıdy.
Búginde elordalyq polıtsııanyń eskort vzvody tek resmı is-sharalardyń qaýipsizdigin qamtamasyz etetin bólimshe ǵana emes, zamanaýı polıtsııanyń ózindik vızıt kartasyna aınalǵan desek artyq bolmas. Al onyń artynda — kóp jylǵy daıyndyq, minsiz tártip pen jaýapkershilikti ómirlik ustanymyna aınaldyrǵan jandar tur.
