Qatelikterimmen, qalada qordalanǵan máselelermen 24 saǵat boıy jumys istep kelemin - Erbolat Dosaev

ALMATY. QazAqparat – Óz qatelikterimmen, qalanyń qordalanǵan máselelerimen táýligine 24 saǵat boıy jumys istep kelemin. Almaty ákimi Erbolat Dosaev Medeý aýdanynyń turǵyndarymen kezdesýinde osylaı aıtty, dep habarlaıdy QazAqparat tilshisi.

Erbolat Dosaevtyń qala halqymen kezdesý barysynda jergilikti turǵyn №48 mektep oqýshylary ata-analarynyń atynan alańdaýshylyǵyn jetkizip, suraq qoıǵan.

«№48 mekteptiń paıdalanýǵa berilmeı jatqanyna ekinshi jyl boldy, ony berý merzimi únemi keıinge shegerilip keledi. Sonyń kesirinen balalarymyz basqa mektepke ekinshi aýysymǵa baryp oqyp júr. Qashan óz mektebimizge barady?»,- dep surady qala turǵyny.

Óz kezeginde Erbolat Dosaev №48 mektep jyl sońynda deıin paıdalanýǵa beriletinin aıtty.

«Mekteptiń qurylysy kezinde jańa korpýstyń astynan jumys isteýge múmkindik bermeıtin tastar tabyldy. Qalanyń jańa ákimi retinde aıtaıyn, men táýligine 24 saǵat ózimniń qatelikterimmen jáne qalada qordalanǵan máselelermen jumys istep kelemin. Ókinishke qaraı, qurylys kompanııalary árdaıym ózderine mindettemeler alady, ary qaraı olarda mindetti túrde birdeńe tabylady. Degenmen, kelisimshart mindettemesi boıynsha barlyq jumystar 30 qarashaǵa deıin aıaqtalýy tıis. Osyǵan oraı, usaq jumystar bitken soń, qurylys jumysy tolyǵymen jyl sońyna deıin aıaqtalady dep senemiz», - dedi Erbolat Dosaev.