Qatelikpen 15 jyl túrmede otyrǵan amerıkandyqqa 3 mln. dollar beriledi
ASTANA. QazAqparat - Nıý-Iork turǵyny Djabbar Kollınz sottyń qate tóreliginen 15 jyl temir tordyń ar jaǵynda otyrdy. 10 maýsymda ol Nıý-Iork shtatynyń prokýratýrasymen sottan tys kelisim jasady. Soǵan sáıkes ol endi 3 mıllıon dollar kóleminde ótemaqy alady, dep jazady ITAR-TASS.
Qazir jasy 42-ge kelgen Kollınz 1994 jyly tonaý maqsatymen brýklın ravvınin óltirdi degen kúdikpen qamaýǵa alynǵan bolatyn. Jala jabylǵan kezde-aq ol detektıvterge bir qate ketkenin: qylmys jasalǵanda ol óz úıinde bolǵanyn málimdedi. Alaıda sotta jaýap bergen eki kýáger Kollınzdiń qylmys jasalǵan orynnan ketip bara jatqanyn kórgenderin aıtty. Nátıjesinde, sot alqasy er adamdy aıypty dep tanyp, sýdıa ony ómir boıy bas bostandyǵynan aıyrý jazasyna kesti. Alaıda amerıkandyq eńsesin túsirmedi: ol túrmedegi kitaphanaǵa jazylyp, onda zańgerlikti oqı bastaǵan. Kollınz is materıaldaryn ákelip berýdi talap etip, birneshe appelıatsııa berdi. Aqyr sońynda, ol prokýratýranyń kýágerlerdi jalǵan jaýap berýge talap etkenin dáleldep shyqty. 2010 jyly jańa faktilerdi qaraǵannan keıin sot ony aqtap, bostandyqqa shyǵardy.
Sodan keıin Kollınz Nıý-Iork shtaty men qalasynyń bıligine ótemaqy tóleýdi talap etip aryzdandy. Shtat bıligi onymen beıbit kelisimge kelýdi jón kórip, oǵan 3 mıllıon dollar tóleıtin boldy.
«Úsh mıllıon dollar - kóp aqsha. Biraq bul Kollınzdyń qatań rejımdegi túrmede ótkizgen jyldary úshin tólenýi kerek somanyń az ǵana mólsheri. Biz Nıý-Iorkke áldeqaıda iri mólsherdegi ótemaqy tóleýge týra keledi degen senimdemiz», - dep málimdedi advokat Djoel Rýdın.
