Qatelik jiberse, dáriger de qylmystyq jaýapqa tartylýy kerek – Birtanov
«Dárigerler eshqandaı jaýapkershilik artpaýy kerek dep aq halatty abzal jandardyń biri de aıtpaıdy. Álemdik normalar men talaptar bar. Dárigerler de qylmystyq jaýapqa tartylýy múmkin, qatelik jiberse tartylýy da kerek. Atap aıtqanda eger dáriger medıtsınalyq kómek kórsetpese nemese esirtki zatynyń aınalymymen baılanysy bolsa álbette jazalanady. Alaıda, Prezıdent «dárigerdiń qateligi» men «olaqtyqtyń» ara jigin ajyratýdy tapsyrdy. Mine, osy másele tóńireginde talqylaý bolady. Sebebi biz – medıtsınadaǵy keleńsizdiktermen kúres júrgizý jáne medıtsınalyq kómektiń standarttaryn saqtaýda tolyqqandy jaýapkershilikti moınymyzǵa alamyz jáne oǵan kepildik beremiz deýimiz kerek», - dedi Eljan Birtanov Densaýlyq saqtaý mınıstrliginiń Facebook paraqshasynda «Habar 24» arnasy tilshisiniń suraǵyna jaýap bere otyryp.
Mınıstrdiń aıtýyna qaraǵanda, dárigerdiń barynsha jumys júrgizgenin, alaıda «medıtsınalyq oqıǵanyń» tirkelý jaǵdaıyn da ajyratyp alý kerektigin aıtyp ótti.
«Dáriger medıtsınalyq qyzmetti kórsetý kezinde qandaı da bir standarttardyń saqtalmaǵany anyqtalsa – ol qylmystyq jaýapkqa tartylmaýy kerek. Ol úshin ákimshilik jaýapkershilik bar. Eń bastysy ol jerde dıplomnan aıyrýǵa deıingi kásibı jaýapkershiliktiń de baryn umytpaý kerek», - dedi Eljan Birtanov.