Qateliginen naýqas múgedek ne mert bolǵan dárigerdi jazalaý durys pa – vıtse-mınıstr jaýaby

ASTANA. KAZINFORM – Elimizdiń turǵyndary damyǵan memleketterge qaraǵanda jedel járdem qyzmetine 3-4 ese kóp júginedi. Bul týraly Densaýlyq saqtaý vıtse-mınıstri Tımýr Muratov aıtty.

- Halyqaralyq standartqa saı 30 myń adamǵa 1 reanımobıl bolýy kerek. Bizde 10 myń adamǵa bir mashına bar. Jalpy, standarttan 3 ese joǵarymyz. Biraq, elimizde jedel járdem qyzmetine júginý damyǵan kóp elge qaraǵanda 3-4 ese kóp. Shetelde dene qyzýy kóterilgen adamǵa eshqandaı brıgada baryp kómek kórsetpeıdi. Jedel járdem qyzmetiniń negizgi jumysy – adamnyń ómirine qaýip tóngen kezde kelý. Olar – kópjaraqat, ınsýlt, ınfarkt jáne basqa hırýrgııalyq jaraqattar. Osyndaı jaǵdaıda tez jetip, kómek kórsetýi qajet, - dedi ol elordada ótip jatqan halyqaralyq is-shara aıasynda BAQ ókilderiniń saýalyna oraı.

Sonymen qatar vıtse-mınıstr dárigerdiń qateliginen naýqas kemtar bolyp qalsa nemese mert bolǵan jaǵdaıda ony jazalaýǵa qatysty saýalǵa jaýap berdi.

- Dáriger naýqastyń janyn qınaıyn, jamandyq jasaıyn dep janyna jaqyndamaıdy. Dáriger qolynan kelgenshe naýqastyń densaýlyǵyn durystaýǵa tyrysady. Sondaı kómek kórsetip jatqan kezde árıne, adam balasy qatelesýi múmkin. Mashına, robot ta qatelesedi. Mundaı qatelikterdi qarastyryp, dáriger ádeıi istemese, onda ony jazalaýǵa bolmaıdy, - dedi Tımýr Muratov.