Qatelesip túsken bomba: Ońtústik Koreıadaǵy apattan jaralanǵandar sany artty

SEÝL. KAZINFORM – Ońtústik Koreıa áskerı-áýe kúshteriniń eki KF-16 joıǵysh ushaǵy jattyǵý kezinde alańnan qatelesip, oqý-jattyǵý ornyna jaqyn jerdegi aýylǵa 8 bomba tastaǵan. Jaralanǵandar sany 15 adamǵa jetti, dep habarlady Yonhap.

Bıliktiń habarlaýynsha, jarylys Seýlden soltústikke qaraı 40 shaqyrymdaı jerdegi Phochhon aýylynda tańǵy saǵat 10-dar shamasynda bolǵan. 15 adam jaraqat alǵan, onyń ishinde eki sarbaz ben eki sheteldik azamat bar. Shirkeý men taǵy jeti ǵımaratqa zaqym kelgen.

Órt sóndirýshiler beti jáne ıyǵynan aýyr jaraqat alǵan eki azamatty aýrýhanaǵa jetkizdi. Qutqarýshylar qazir olardyń ómirine qaýip tónip turǵan joq ekenin málimdedi. Taǵy segiz adam jeńil jaraqatpen aýrýhanaǵa jetkizilgen.

Bılik zardap shekkender sany artady dep boljap otyr, sebebi medıtsınalyq kómekke júgingen adamdar kóp. 

Aımaqtyń 50-ge jýyq turǵyny evakýatsııalandy. Áýe kúshteri «apatty» shtab bastyǵynyń orynbasary general-leıtenant Pak Kı Vannyń basshylyǵymen tergep jatqanyn aıtyp, beıbit turǵyndarǵa keltirilgen shyǵyn úshin keshirim surady. 

— Biz beıbit turǵyndarǵa zııan keltirilgenimiz úshin ókinish bildiremiz jáne zardap shekkenderdiń tezirek saýyǵyp ketýin tileımiz. Biz barlyq qajetti sharany qoldanamyz, keltirilgen zalaldyń ornyn toltyramyz, - delingen Áýe kúshteri málimdemesinde.

Aıta keteıik, oqý-jattyǵýǵa 160-tan astam áskerı tehnıka, sonyń ishinde K2 tankteri, K55A1 gaýbıtsalary, shabýyldaǵysh tikushaqtar jáne F-35A ushaqtary qatysqan.

Buǵan deıin Ońtústik Koreıa Áskerı-áýe kúshteriniń eki KF-16 joıǵysh ushaǵy jaýyngerlik jattyǵýlar kezinde polıgon syrtyna qatelesip segiz bomba tastaýy saldarynan 7 adam jaraqat alǵanyn jazǵan edik.