Qate tapsyrylǵan deklaratsııany qalaı túzetýge bolady

ASTANA. QazAqparat – Jalpyǵa birdeı deklaratsııalaý sheńberinde deklaratsııalardy tapsyrý merzimi aıaqtalýǵa jaqyn, dep habarlaıdy QazAqparat Memlekettik kirister komıtetiniń baspasóz qyzmetine silteme jasap.

«Men 250.00 nysandaǵy deklaratsııaǵa (jeke tulǵanyń aktıvteri men mindettemeleri týraly deklaratsııa) aqparatty qate engizdim, derekterdi qalaı qaıtarýǵa nemese túzetýge bolady?» Osy saýal jeke tulǵalardan jıi túsetin bolǵan. Bul rette, Komıtet jaýaby kelesideı:

«Deklaratsııany 250.00 eseptilik nysanyn «Salyq tóleýshiniń kabıneti» arqyly («Salyq ótinishteri» bólimi, budan ári «Salyq eseptiligin keri qaıtaryp alý týraly ótinish»); Egov portaly («Keden jáne salyqtar» bólimi, «Salyq salý» bólimshesi, «Deklaratsııany keri qaıtaryp alý» qyzmeti) arqyly keri qaıtarýǵa nemese túzetýge bolady.

Deklaratsııany tolyǵymen keri qaıtarý kelesi jaǵdaılarda júzege asyrylady:

- merzimi ıaǵnı deklaratsııa tapsyrylǵan esepti jyly durys kórsetilmegen bolsa;

- deklaratsııany tapsyrý boıynsha is júzinde eshqandaı mindetteme joq bolsa.

Eger Siz deklaratsııada qate jiberip, salyq organynyń kodyn, rezıdenttik mártebesin nemese salyq eseptiliginiń túrin durys emes kórsetken bolsańyz, onda túzetý ádisi boıynsha deklaratsııa keri qaıtaryp alynady (deklaratsııa júıede qalady jáne ony tabystaý kúni ózgermeıdi).

Basqa jaǵdaılarda, ıaǵnı sandarda qate jibergen málimetterdi (kirister, qolma-qol aqsha, jyljymaly/jyljymaıtyn múlik jáne Qazaqstan Respýblıkasynan tysqary jerlerdegi banktik shottardaǵy aqsha jáne t.b. týraly) tolyq kórsetpegen bolsańyz, aıyrmashylyqtyń somasyn nemese kórsetilmegen aqparatty «qosymsha» deklaratsııany tabystaý arqyly túzete alasyz».