Qate rásimdelgen aıyppuldar joıylady: ІІM júrgizýshilerge úndeý jasady
ASTANA. KAZINFORM – QR Іshki ister mınıstrligi aqparattyq júıedegi tehnıkalyq aqaý saldarynan qate qalyptastyrylǵan nusqamalarǵa qatysty jaǵdaıdy túsindirdi.
— Qurmetti júrgizýshiler! Qazir tasjoldardaǵy jyldamdyqqa qatysty aıyppuldar boıynsha biraz másele týyndaǵanyn kórip otyrmyz. Sondyqtan ne bolǵanyn qysqasha túsindirgimiz keledi. 13-14 tamyz aralyǵynda Bas prokýratýranyń «ERAP» aqparattyq júıesinde nusqamalardy avtomatty túrde qalyptastyrý kezinde tehnıkalyq aqaý boldy. Sonyń saldarynan ortasha jyldamdyqty asyrý boıynsha keıbir buzýshylyqtar bir-sáttik jyldamdyqty asyrý retinde qate rásimdelgen. Qazir áriptesterimizben birlesip, tehnıkalyq aqaýdyń saldaryn joıý boıynsha jumys júrgizip jatyrmyz. Júrgizýshilerge aıtarymyz: eshqaıda barýdyń, polıtsııaǵa júginýdiń nemese dáleldeýdiń qajeti joq. Qate qalyptastyrylǵan barlyq nusqama anyqtaldy jáne olar avtomatty túrde joıylady,-delingen habarlamada.
Sonymen qatar onda áńgimeniń tek tasjoldarda qate rásimdelgen aıyppuldar týraly bolyp otyrǵany aıtylǵan. Al mundaı aıyppuldardy tólep qoıǵan júrgizýshilerge qarajatty qaıtarý máselesi qazir pysyqtalyp jatyr.
-Jaǵdaı baqylaýda, — dedi ІІM Ákimshilik polıtsııa komıtetiniń tóraǵasy Murat Qabdenov.
Osyǵan deıin Astanada mas kúıinde kólik júrgizetin júrgizýshilerge baqylaý kúsheıgeni týraly jazdyq.
