Qate engizilgen 24 derek ınvestordy mıllıondaǵan teńge sýbsıdııadan qaǵa jazdady
ASTANA. KAZINFORM — Qostanaı oblysynyń Qarabalyq aýdanynda veterınarlyq aqparattyq júıege qate engizilgen málimetter ınvestordyń 9,3 mıllıon teńge memlekettik sýbsıdııa alýyna kedergi bolǵan. Máseleni prokýratýra aralasqannan keıin ǵana sheshý múmkin boldy.
Investor Reseıden taýarly-sút fermasyn qurý jobasy aıasynda 401 asyl tuqymdy iri qara satyp alǵan. Alaıda veterınarlyq qyzmet 24 maldy tirkeý kezinde olardyń týǵan kúnderin qate kórsetken.
— Saldarynan aqparattyq júıedegi derekter asyl tuqymdy maldyń kýálikterindegi málimettermen sáıkes kelmeı qalǵan. Bul aıyrmashylyq ınvestordyń 9,3 mıllıon teńge kólemindegi memlekettik sýbsıdııaǵa ótinish berýine kedergi keltirdi, — delingen habarlamada.
Prokýratýra tekserý barysynda qatelikke jol bergen laýazymdy tulǵanyń kinásin anyqtap, ony tártiptik jaýapkershilikke tartqan. Sonymen qatar ınvestorǵa sotqa júginý boıynsha quqyqtyq kómek kórsetilgen.
Bitistirý kelisimi bekitilgennen keıin veterınarlyq stantsııa aqparattyq júıedegi qate málimetterdi túzetti. Osydan soń ınvestor sýbsıdııa alýǵa qaıta ótinish bergen.
Osylaısha, prokýratýranyń aralasýynan keıin ákimshilik kedergi joıylyp, ınvestordyń buzylǵan quqyǵy qalpyna keltirildi.
Eske salaıyq, buǵan deıin Qaraǵandyda ınvestorlarǵa negizsiz qarjylyq sanktsııalar qoldanylǵanyn jazǵanbyz.
