Qatarmen saýda-sattyqty damytýǵa qajetti barlyq jaǵdaı jasaldy – dedi Prezıdent
Prezıdent kelissózderge mándi de, maǵynaly pikir almasý boldy dep baǵa berdi, dep habarlaıdy QazAqparat Aqordanyń resmı saıtyna silteme jasap.
Qasym-Jomart Toqaev Qazaqstan men Qatar arasynda dıplomatııalyq qarym-qatynas ornaǵan 30 jyl ishinde eki eldiń yntymaqtastyǵy nyǵaıyp, saýda-ekonomıkalyq jáne mádenı-gýmanıtarlyq salalardaǵy baılanystar, sondaı-aq jahandyq jáne óńirlik qurylymdar aıasyndaǵy is-áreketter damyp kele jatqanyn atap ótti.
–Jalpy, Qatar – biz úshin Taıaý Shyǵystaǵy óte mańyzdy seriktes. Sebebi Doha bizdiń áleýmettik-ekonomıkalyq, saıası reformalarymyzǵa alǵashqylardyń biri bolyp qoldaý kórsetti. Men muny búgin sheıh Támımniń ózine de aıttym. Onyń ekijaqty yntymaqtastyqty nyǵaıtýǵa qosqan úlesin joǵary baǵalaımyz. Halqymyzdyń atynan rızashylyq bildirdim, – dedi Memleket basshysy.
Prezıdenttiń aıtýynsha, búgingi kelissózder nátıjesinde taraptar mańyzdy máselelerdi talqylap, birqatar kelisimge kelgen.
– Qazaqstan men Qatar ekijaqty qarym-qatynastaǵy saýda-ekonomıkalyq jáne ınvestıtsııalyq yntymaqtastyqqa basa nazar aýdarady. Alaıda koronavırýs indeti jáne geosaıası ahýal áleýetimizdi tolyq paıdalanýǵa múmkindik bermedi. Sol sebepti sońǵy jyldary saýda-sattyǵymyz báseńdep ketti. Endigi maqsatymyz – elderimiz arasyndaǵy taýar aınalymyn jandandyrý. Buǵan qolaıly jaǵdaı jasaldy, – dedi Qasym-Jomart Toqaev.
Qazirgi ýaqytta Qatardyń birneshe kompanııasy Qazaqstannyń aýyl sharýashylyǵy salasynda tabysty jumys istep jatyr. Olardyń ónimi birqatar memleketke eksporttalady. Sonymen qatar taraptar geologııalyq barlaý, taý-ken ónerkásibi, kólik-logıstıka, qarjy jáne bank sektoryn damytýǵa ýaǵdalasty. Osyǵan oraı búgin birqatar mańyzdy qujattarǵa qol qoıyldy.
Memleket basshysy bul kelisimderdiń qazaq-qatar qatynastarynyń damýyna tyń serpin beretinine senimdi ekenin jetkizdi.
Foto: akorda.kz
