Katarlyq ınvestorlar Qazaqstannyń aýyl sharýashylyǵyna 500 mln dollar salmaq
ASTANA. KAZINFORM - Memleket basshysy Qasym-Jomart Toqaevtyń Katar memleketine sapary aıasynda memleketter arasyndaǵy aýyl sharýashylyǵy sektoryndaǵy áriptestik týraly, onyń ishinde ınvestıtsııalyq áriptestik týraly birqatar kelisimderge qol qoıyldy.
Katarlyq ınvestorlar Qazaqstanda ósimdik sharýashylyǵy ónimderin tereń óńdeýge ınvestıtsııa salýǵa nıetti: Katarlyq Hassad Food kompanııasy, Túriktiń Tiryaki kompanııasy jáne "Báıterek" Ulttyq basqarýshy holdıngi arasynda Aqmola oblysynda zaýyt salý týraly ýaǵdalastyqty kózdeıtin kelisimge qol qoıyldy. Bul joba 200 mıllıon AQSh dollaryna baǵalanyp, astyq pen burshaqty tereń óńdeýmen aınalysýǵa baǵyttalǵan.
Sonymen qatar, Katarda Dinara Group holdıngi men Qatar National Enterprises arasynda aýyl sharýashylyǵyn damytý, qurylys jáne ınfraqurylymdyq damý, densaýlyq saqtaý jáne bilim berý úshin strategııalyq ınvestıtsııalyq seriktestik týraly shartqa qol qoıyldy. Qazaqstan men Ortalyq Azııanyń agrarlyq sektoryn damytý úshin birlesken tikeleı ınvestıtsııalar qoryn qurý josparlanýda.
Qol qoıylǵan shart sheńberinde Dinara Group holdıngi qoldanystaǵy sút, et jáne ósimdik sharýashylyǵy óndiristerin masshtabtaýdy, asyl tuqymdy mal basynyń ózindik negizin damytýdy jáne qosymsha sút fermalaryn, sút óńdeý jáne irimshik óndirý zaýytyn salýdy jáne daıyn ónimdi Qytaı men Taıaý Shyǵys elderine eksporttaýdy josparlap otyr. Investıtsııa kólemi shamamen 300 mıllıon AQSh dollaryn quraıdy, bul Katardaǵy seriktesterdiń joǵary senimin kórsetedi.
QR Aýyl sharýashylyǵy mınıstri Aıdarbek Saparov aýyl sharýashylyǵy sektorynda ınvestıtsııalar tartýǵa jáne áriptestikti damytýǵa baǵyttalǵan birqatar kezdesýler ótkizdi. Katar memleketi mýnıtsıpalıtetiniń Mınıstri Abdýlla ben Hamad bın Abdýlla Al Attııamen kezdesý barysynda saladaǵy, atap aıtqanda, Katarǵa qoı men dándi daqyldardy jetkizý jónindegi strategııalyq maqsattar men josparlar talqylandy. 2024 jyly Qazaqstan Katarǵa qoı etiniń eksportyn eki esege arttyrýǵa nıetti. Vedomstvo basshylary dándi daqyldardy Katarǵa Iran logıstıkasy arqyly júzege asyrýdy talqylady.
