Qatarǵa jumysqa barǵan qazaqstandyqtardyń quqyǵy qorǵalady - zań
ASTANA. KAZINFORM — Búgin Senattyń jalpy otyrysynda «Qazaqstan Úkimeti men Qatar Úkimeti arasyndaǵy Qazaqstan Respýblıkasynan kelgen jumyskerlerdi Qatar Memleketinde jumysqa ornalastyrýdy retteý týraly kelisimdi ratıfıkatsııalaý týraly» Zańy maquldandy.
- 2024 jylǵy 14 aqpanda Memleket basshysynyń Qatarǵa sapary barysynda Qazaqstan Respýblıkasynan kelgen jumyskerlerdi Qatar Memleketinde jumysqa ornalasýyn retteý týraly kelisimge qol qoıyldy. Kelisimniń maqsaty – Qazaqstan azamattarynyń Qatardaǵy quqyqtyq jáne áleýmettik qorǵalýyn qamtamasyz etý, - dedi senator Rýslan Rústemov.
Kelisimde ózara ýaǵdalastyqtyń oryndalýyn baqylaıtyn ýákiletti organdary aıqyndalǵan - Qazaqstan jaǵynan Eńbek jáne halyqty áleýmettik qorǵaý mınıstrligi, Qatar tarapynan - Eńbek mınıstrligi.
- Qazaqstan azamatyn Qatar Memleketinde jumysqa ornalastyrý rásimi qatarlyq jumys berýshiniń ótinim berýinen bastalady. Onda biliktilik talaptary, eńbek jaǵdaılary, eńbek shartynyń uzaqtyǵy jáne basqa da málimetter kórsetiledi. Ótinimderdi jınaǵannan keıin, Qatar Memleketiniń Eńbek mınıstrligi olardy Qazaqstanǵa jiberedi. Ótinimderdi alǵan soń, qazaqstandyq tarap Qatarda jumys isteý úshin kandıdattardy jınaı bastaıdy. Ol úshin mynadaı aıqyn rásimder belgilenedi. Birinshiden, halyqty elektrondy eńbek bırjasy arqyly habardar etý. Ekinshiden, qazaqstandyq azamattardy jumysqa qabyldaý jáne olardyń Qatarda jumysqa ornalasý kezindegi quqyqtaryn aıqyndaý. Qatar tarapynyń ótinimderi boıynsha qatarlyq jumys berýshi men qazaqstandyq jumysker arasynda eńbek sharty jasalady, - dedi depýtat.
Shart eki eldiń mınıstrlikteri men elshilikterinde tirkeledi jáne onyń mazmuny Qatar zańymen qatań retteledi. Úlgilik eńbek shart Kelisimge qosa beriledi jáne onyń ajyramas bóligi sanalady.
Úlgilik eńbek shartynda jumys berýshi tarapynan qamtamasyz etiletin mynadaı kepildikter kózdelgen:
– turǵyn úı nemese baspanaǵa járdemaqy berý;
– jumys ornyna deıin jáne keri qaıtý úshin tegin kólik nemese kólik járdemaqysyn berý;
– Qatar zańnamasyna sáıkes medıtsınalyq qyzmet kórsetý;
– jyl saıynǵy demalysty qosa alǵanda, jumysqa ornalasý jáne eńbek shartynyń aıaqtalýy kezinde Qazaqstanǵa ushýǵa aqy tóleý.
Senatordyń aıtýynsha, jumys berýshiniń eńbek shartynyń erejelerine qandaı da bir ózgerister engizýge quqyǵy joq. Eger jumysker men jumys berýshi arasynda daý týyndasa, bul jaǵdaı aldymen Qatardyń Eńbek mınıstrliginde qaralady. Beıbit retteý bolmasa, Qatar memleketinde sotqa beriledi.
Kelisimniń oryndalýyn úılestirý maqsatynda birlesken komıtet qurylady. Qatar Memleketi osy Kelisimdi 2024 jylǵy 29 qarashada ratıfıkatsııalaǵan.
Buǵan deıin Qatarda Qazaqstan azamattaryna jumysqa ornalasý jeńildeıtinin jazǵan edik.