Qatarǵa jyl basynan beri 2,6 mıllıonnan astam týrıst barǵan
ASTANA. KAZINFORM — Qatar bıyl qańtar-qyrkúıek aılarynda 2 mıllıon 614 myń týrıst qabyldaǵanyn habarlady, dep jazady Kazinform Anadolu agenttigine silteme jasap.
Qatardyń Týrızm basqarmasynyń málimetinshe, qyrkúıekte elge kelgen týrıster sany ótken jyldyń osy aıymen salystyrǵanda 1,1 paıyz ósip, 273 myńnan 276 myńǵa jetken.
Jyldyń alǵashqy toǵyz aıynda elge kelgen týrısterdiń basym bóligi Parsy shyǵanaǵy arab memleketteri yntymaqtastyǵy keńesine (PShMYK) múshe memleketterden kelgen. Olardyń sany 1 mıllıon 69 myń adam boldy.
Azııa jáne Okeanııa elderinen kelgen 548 myń saıahatshy ekinshi orynǵa jaıǵassa, Eýropa memleketteri 538 myń týrıst kórsetkishimen úshinshi orynǵa ornalasty.
Basqa da arab elderinen 184 myń, al Afrıkanyń ózge elderinen 84 myń týrıst kelgen.
2025 jyly 5,1 mıllıon týrıst qabyldap, rekord ornatqan Qatar bıyl Soltústik Amerıka men Azııadan keletin týrısterdiń sıregenin baıqap otyr. Buǵan Taıaý Shyǵystaǵy shıelenis pen áýe qatynasyndaǵy qaýipsizdik máseleleri áser etken. Sonymen qatar Parsy shyǵanaǵyndaǵy kórshi elderden qurlyq jáne qysqa áýe reısteri arqyly kelgen týrısterdiń kóp bolýy Qatardaǵy týrızmniń turaqty damýyna yqpal etti.
Keıingi kezde ınfraqurylym men týrızmge qomaqty ınvestıtsııa quıǵan Qatar óńirdegi jetekshi týrıstik ortalyqtardyń birine aınalýǵa umtylyp otyr.
Jyl sońyna deıin Katarda birqatar halyqaralyq is-shara ótip, elge keletin týrıster sany arta túspek.
Buǵan deıin Astana jylyna 6 mln týrıst qabyldaı alatynyn jazǵan edik.
