Qatarǵa shabýyl jasalǵan jaǵdaıda onyń qaýipsizdigin AQSh qamtamasyz etedi

ASTANA.KAZINFORM - AQSh Qatarǵa jasalǵan kez kelgen qarýly shabýyldy óz qaýipsizdigine qater tóndi dep sanaıdy. Bul týraly Aq úıdiń saıtynda jarııalanǵan AQSh prezıdenti jarlyǵynyń mátininde aıtylǵan, dep habarlaıdy Kazinform agenttiginiń menshikti tilshisi.

Buıryq boıynsha, AQSh Qatar memleketiniń aýmaǵyna, egemendigi men mańyzdy ınfraqurylymyna jasalǵan kez kelgen qarýly shabýyldy Amerıka Qurama Shtattarynyń turaqtylyǵy men qaýipsizdigine tóngen qater dep sanaıdy.

-Mundaı shabýyl jasalǵan jaǵdaıda Qurama Shtattar AQSh pen Qatar memleketiniń múddesin qorǵaý jáne turaqtylyq pen qaýipsizdikti qalpyna keltirý úshin dıplomatııalyq, ekonomıkalyq jáne qajet bolǵan jaǵdaıda áskerı sharalardy qosa alǵanda, barlyq zańdy jáne qajetti sharalardy qabyldaıdy, - delingen qujatta.

Onda Qorǵanys mınıstri Memlekettik hatshymen jáne Ulttyq barlaý dırektorymen birlesip, Dohaǵa qarsy kez kelgen sheteldik agressııaǵa jyldam jáne kelisilgen jaýap berýdi qamtamasyz etý úshin Qatar memleketimen birge tótenshe jaǵdaılardy josparlaýdy júrgizýi kerek ekenin atap ótedi.

Qatar óz tarapynan buıryqty quptap, onyń Doha men Vashıngton arasyndaǵy berik jáne uzaq merzimdi baılanystardy kórsetetinin atap ótti. Qatar Syrtqy ister mınıstrligi bul sheshimniń eki eldiń qorǵanys salasyndaǵy tyǵyz yntymaqtastyǵyn nyǵaıtýdaǵy mańyzdy qadamy ekenin atap ótti.

-Qatar Memleketiniń Syrtqy ister mınıstrligi Qatar senimdi deldal retinde ortaq problemalardy sheshý, dıplomatııalyq qaqtyǵystardy retteýdi ilgeriletý jáne aımaqtaǵy turaqty beıbitshilikti qoldaý úshin AQSh jáne halyqaralyq seriktestermen jumys isteýge daıyn ekenin rastaıdy, - delingen Qatar Syrtqy ister mınıstrliginiń málimdemesinde.

Esterińizge sala keteıik, 9 qyrkúıekte Qatar astanasy Dohada birneshe jarylys boldy. Shabýyldar úshin jaýapkershilikti Izraıl bıligi óz moınyna aldy.

BUU Qaýipsizdik keńesi Dohaǵa jasalǵan soqqyny aıyptady.