Qatardyń PIH kompanııasy Astana Hub-qa tirkeldi
ASTANA. KAZINFORM – Qatardyń Power International Holding (PIH) kompanııasy Astana Hub halyqaralyq tehnoparkine tirkeldi. Alpaýyt holdıng ózine tıesili tsıfrlyq sheshimderdi Astanadaǵy startap alańynda iske asyrý múmkindikterin qarastyryp jatyr.
Bul týraly Syrtqy ister mınıstriniń orynbasary Álibek Qýantyrov pen PIH -tiń Qazaqstandaǵy basqarýshy dırektory Amer Mahasenniń kezdesýinde málim boldy.
«Kazakh Invest» ulttyq kompanııasynyń málimetine súıensek, Qazaqstan taraby qatarlyq kompanııa ókilderimen energetıka, telekommýnıkatsııa, densaýlyq saqtaý, aqparattyq tehnologııalar men taý-ken metallýrgııasy salalarynda birlesken jobalardy iske asyrý múmkindikterin pysyqtaǵan.
Amer Mahasen holdıng Qazaqstandaǵy ınvestıtsııasynyń aıasyn keńeıtýge nıetti ekenin atap ótken.
- Kompanııa IT-startaptardyń halyqaralyq tehnoparki – «Astana Hub» bazasynda zańdy tulǵasyn tirkedi. Osy alańda óziniń tsıfrlyq sheshimder men qyzmetterdi iske asyrý múmkindikterin qarastyryp jatyr. PIH-tiń densaýlyq saqtaý ınfraqurylymynda halyqaralyq tájirıbesi mol ekenin eskersek, medıtsınalyq mekemelerdi salyp, basqarýǵa ınvestıtsııa salatyn múmkindigi bar. Sondaı-aq, taý-ken metallýrgııa sektorynda jer qoınaýyn paıdalaný naryǵyna shyǵý perspektıvalary zerttelip jatyr, - dep jazylǵan resmı málimette.
Kezdesýde PIH pen Qazaqstan Úkimetiniń arasyndaǵy birlesken ózekti jobalardy qamtıtyn ınvestıtsııalyq kelisimdi daıyndaý máselesi de talqylandy.
Aıta ketý kerek, PIH Qazaqstanda birneshe strategııalyq mańyzdaǵy jobalardy iske asyryp jatyr. Atap aıtsaq, Qashaǵan ken ornynda qýaty jylyna 1 jáne 2,5 mlrd tekshe metr bolatyn eki gaz óńdeý zaýytyn salý, «Beıneý – Bozoı – Shymkent» magıstraldy gaz qubyrynyń ekinshi jelisin tartý, KS-14 kompressorlyq stantsııasyn jáne «KS-14 – Aqtóbe – Qostanaı» magıstralin salý jobalaryna qatysyp otyr.
Al 2023 jyly osy holdıng Tele2 jáne Altel kompanııalarynyń 100% aktsııasyn satyp alǵan edi.