Qatardyń eń iri energetıkalyq keshenindegi jarylys: 50-den astam adam jaraqat aldy
ASTANA. KAZINFORM – Qatardyń suıytylǵan tabıǵı gaz óńdeý boıynsha negizgi zaýytyndaǵy jarylystan 54 adam zardap shekti, taǵy 18 adam iz-túzsiz joǵaldy, dep habarlaıdy Al Jazeera.
Oqıǵa Ras-Laffan ónerkásip qalashyǵynda boldy. Resmı tulǵalar buǵan deıin oqıǵa ornyna kelgen azamattyq qorǵanys toptary eshqandaı shyǵyn týraly habarlamaǵanyn málimdegen bolatyn.
Qatar Іshki ister mınıstrligi joǵalǵan adamdardy izdeý jáne qutqarý operatsııasyn júrgizý úshin halyqaralyq izdeý-qutqarý toby jiberilgenin habarlady.
Vedomstvo sonymen qatar jarylysqa «tehnıkalyq aqaý» sebep bolǵanyn málimdedi.
Ónerkásip ortalyǵyn basqaratyn Qatar Energy kompanııasy Barzandaǵy zaýytta bolǵan jarylystan keıin tótenshe jaǵdaılarǵa jaýap berý toptary dereý jiberilip, órt baqylaýǵa alynǵanyn habarlady.
Dohadan soltústikke qaraı shamamen 80 shaqyrym jerde ornalasqan Ras-Laffan ónerkásip qalasy – álemdegi suıytylǵan tabıǵı gaz eksportynyń eń iri ortalyǵy.
Qatar úkimeti naýryz aıynda ónerkásiptik ortalyq Irannyń zymyran jáne dron shabýyldarynan «aıtarlyqtaı zııan shekkenin» jarııalady. Osydan keıin Qatar Energy kompanııasy suıytylǵan tabıǵı gazdy jetkizý boıynsha uzaq merzimdi kelisimsharttarynda fors-majorlyq jaǵdaıdy jarııalap, búlingen qýatty qalpyna keltirýge 5 jylǵa deıin ýaqyt qajet ekenin eskertti.
