Qatardyń burynǵy ámiri sheıh Hamad ben Halıfa Ál Tanı qaıtys boldy
ASTANA. KAZINFORM — Qatardyń burynǵy ámiri, resmı túrde «Ámir áke» ataǵyn ıelengen sheıh Hamad ben Halıfa Ál Tanı 74 jasynda dúnıeden ótti, dep habarlaıdy Kazinform agenttiginiń menshikti tilshisi.
Qatar Ámiriniń keńsesi taratqan málimdemede onyń jeksenbi kúni tańerteń qaıtys bolǵany aıtyldy.
— Uly Jaratýshynyń jazýyna ıman keltirgen kúıde Qatar Ámiriniń keńsesi elimiz úshin orny tolmas qazaǵa baılanysty kóńil aıtady. Joǵary mártebeli Ámir áke sheıh Hamad ben Halıfa Ál Tanı dúnıeden ótti. Alla taǵala oǵan raqymyn jaýdyrsyn, — delingen resmı málimdemede.
A Statement by Amiri Diwan
— Qatar News Agency (@QNAEnglish) July 12, 2026
The Amiri Diwan announced the death of HH the Father Amir Sheikh Hamad bin Khalifa Al-Thani on Sunday morning July 12, 2026. The Amiri Diwan statement added: May Allah have mercy on his soul and grant him the best reward for what he achieved for his… pic.twitter.com/YhNY7x6GAO
Sheıh Hamad Qatardy 1995–2013 jyldary basqardy. Onyń tusynda el aýqymdy ekonomıkalyq, áleýmettik jáne ınfraqurylymdyq jańǵyrý kezeńinen ótip, suıytylǵan tabıǵı gaz óndirý men eksporttaý boıynsha álemdegi jetekshi memleketterdiń birine aınaldy.
Soltústik gaz ken ornyn qarqyndy ıgerýdiń nátıjesinde Qatar suıytylǵan tabıǵı gaz eksportynan álemdik kóshbasshylar qataryna qosylyp, halyqaralyq ekonomıkadaǵy yqpalyn edáýir kúsheıtti.
Sheıh Hamad bılik etken jyldary Qatardyń alǵashqy turaqty Konstıtýtsııasy qabyldanyp, alǵashqy mýnıtsıpaldyq saılaý ótti. Bul saılaýda áıelderge daýys berý jáne saılaný quqyǵy berildi.
Sondaı-aq bilim berý, densaýlyq saqtaý jáne ınfraqurylym salalarynda iri jobalar júzege asyryldy. 1996 jyly arab álemindegi eń yqpaldy aqparat quraldarynyń birine aınalǵan «Ál-Jazıra» telearnasy efırge shyqty.
Syrtqy saıasatta Qatar halyqaralyq bedelin nyǵaıtyp, óńirlik janjaldardy retteýdegi mańyzdy deldal ári halyqaralyq kelissózderdiń negizgi alańdarynyń birine aınaldy. Sondaı-aq onyń bıligi kezinde Qatar 2022 jylǵy fýtboldan álem chempıonatyn ótkizý quqyǵyna ıe boldy. Bul arab áleminde ótken alǵashqy álem birinshiligi boldy.
2013 jyldyń maýsymynda sheıh Hamad bılikti óz erkimen sol kezde 33 jasta bolǵan uly, qazirgi Qatar ámiri sheıh Tamım ben Hamad Ál Tanıǵa tapsyrdy. Bul Parsy shyǵanaǵy elderindegi bıliktiń erikti túrde berilýiniń sırek kezdesetin mysaldarynyń biri sanalady.
Qatar Ámiriniń keńsesi marqum Ámir ákeniń eldiń damýyna, sondaı-aq arab jáne ıslam álemine sińirgen eńbegi erekshe bolǵanyn atap ótti.
Osyǵan deıin Qatarda Qazaqstannyń mádenıet kúnderi ótkeni týraly jazdyq.
