Qatardyń bilim ordalary dástúrli oqý júıesine oraldy
ASTANA. KAZINFORM — Qatardaǵy mektepter men joǵary oqý oryndary qashyqtyqtan oqytýdan dástúrli, oqýshy men muǵaliniń bir bólmede sabaq júrgizetin formasyna kezeń-kezeńimen oralyp jatyr. Bul týraly Kazinform agenttiginiń menshikti tilshisi habarlady.
Qatardyń Bilim jáne joǵary bilim mınıstrligi eldegi oqý oryndarynyń dástúrli oqýǵa qaıtarylýy týraly aqparat berdi. Sáýir aıynyń basynan bastap oqý oryndary qashyqtan oqyp júrgen oqýshylardy qaıtadan synypqa shaqyrdy.
Oqý oryndarynyń daıyndyq deńgeıin tekserý úshin vedomstvo ókilderi jeke jáne memlekettik mektepter men ýnıversıtetterdi aralap, oqýshylardyń qaýipsizdigin qamtamasyz etý boıynsha aldyn alý sharalary men protsedýralaryn tekserip otyr.
Mınıstrliktiń habarlaýynsha, bul sheshimge deıin daıyndyq jumystary júrgizilgen. Máselen, qyzmetkerler, ákimshilik personal jáne muǵalimder Іshki ister mınıstrliginiń Azamattyq qorǵaý basqarmasy uıymdastyrǵan trenıngterden ótken. Onda tótenshe jaǵdaılarda qaýipsizdik nusqaýlaryn qoldaný, aldyn ala evakýatsııa júrgizý, evakýatsııa jáne baspanada bolý tártibi boıynsha is-áreketter úıretilgen.
Eske salsaq, buǵan deıin BAÁ mektepterinde halyqaralyq bakalavrıat emtıhandary toqtatylǵany habarlanǵan bolatyn.