Qatardaǵy jaýynger bir otbasyn ottan qutqaryp qaldy
ASTANA. QazAqparat - QR Ulttyq ulany «Ortalyq» óńirlik qolbasshylyǵyna qarasty Astana qalasyndaǵy 6636 áskerı bóliminiń qatardaǵy jaýyngeri Nurlan Momynov óziniń batyldyǵy arqasynda bir otbasyn órtten aman alyp qaldy, dep habarlady «Ortalyq» ÓQ baspasóz qyzmetiniń jetekshisi Qanat Dos.
Naqtyraq aıtqanda, 22 naýryz kúni Nurlan Momynov óz úıinen shyǵyp kele jatyp, №176 saıabaq ýchaskesinde ornalasqan úıdiń terezesinen jalyndaǵan otty kóredi. Júgirip jetkenshe, aınala qara tútinge oranady. Nurlan dereý kórshisin kómekke shaqyryp, esh oılanbastan janyp jatqan úıge kirip, ishinen tútinge býlyqqan eki aılyq bala men onyń anasyn, on jáne on bes jastaǵy eki qyzdy syrtqa alyp shyǵady.
Sondaı-aq, bólmelerdiń birinen essiz jatqan áıel adamdy kórip, ony da der kezinde syrtqa alyp shyǵady. Osylaısha, Nurlannyń qyraǵy áreketiniń arqasynda úlken bir januıa ajal aýzynan aman qaldy. Batyl áreketi úshin Nurlan Momynovty áskerı bólim basshylyǵy marapattady. Al, tilsiz jaýdan aman qalǵan otbasy men kórshileriniń Nurlanǵa aıtar alǵysy sheksiz.
