Qatardaǵy ýnıversıtetter oqytýshy jalaqysyn ulttyq deńgeıge kóterýge mindetteledi

NUR-SULTAN. QazAqparat – Joǵary jáne joǵary oqý ornynan keıingi bilim berý uıymdaryna qoıylatyn biliktilik talaptaryn jetildiriledi. Sonyń aıasynda barlyq joǵary oqý oryndary úshin memlekettik bilim berý granttarynyń qunyn ulttyq deńgeıge deıin kóterý kózdelgen, dep habarlaıdy QazAqparat tilshisi.

Májilis depýtattarynyń saýalyna bergen jaýabynda Premer-Mınııstrdiń orynbasary Eraly Toǵjanov osyndaı málimet aıtty.

«Bilim berý sapasyn qamtamasyz etý maqsatynda búgingi kúni joǵary jáne joǵary oqý ornynan keıingi bilim berý uıymdaryna (JJOKBU) qoıylatyn biliktilik talaptaryn jetildirý sharalary qabyldanýda. Tıisti buıryq jobasy ázirlendi, onda daıyndyq baǵyttarynyń erekshelikterin eskeretin jeke talaptar kózdelgen. Máselen, bilim berý uıymdaryna qoıylatyn biliktilik talaptarynyń jańa jobasynda «Quqyq», «Arhıtektýra jáne qurylys», «Densaýlyq saqtaý» jáne t.b. daıarlaý baǵyttary úshin kadrlardy daıarlaýdaǵy erekshelikterdi qamtıtyn jeke 3 talap qarastyrylýda. «Pedagogıkalyq ǵylymdar» kadrlar daıarlaý baǵyty boıynsha dýaldy oqytýdy júzege asyratyn bilim berý uıymdarymen jasalǵan sharttyń bolýy mindetti talapqa engizildi», - deıdi vıtse-premer.

Sonymen birge, Úkimet basshysynyń orynbasary ózi ataǵan buıryq jobasynda joǵary oqý oryndaryna «Arhıtektýra jáne qurylys» baǵyty boıynsha aqparattyq modeldeý tehnologııasyn jáne t.b. iske asyratyn arnaıy baǵdarlamalyq keshenniń bolýy týraly talap engizý usynylylǵanyn aıtady.

«Jobada 2022 jyldan bastap joǵary oqý ornynan keıingi bilim berý baǵdarlamalary boıynsha kadrlar daıarlaýdy júzege asyratyn oqytýshylarǵa talaptar engizý qarastyrylǵan. Barlyq joǵary oqý oryndary úshin memlekettik bilim berý granttarynyń qunyn ulttyq deńgeıge deıin kóterý, bul rette qatardaǵy ýnıversıtetter oqytýshylarynyń jalaqysyn olardyń deńgeıine deıin kóterý kózdelgen», - dep jazylǵan resmı jaýapta.