Katardaǵy ana men bala ortalyǵynda naýqastardy mýzykamen emdeıdi
ASTANA. QazAqparat - Katarda quny 8 mlrd dollardy quraıtyn Sidra Medicine ana men bala ǵylymı-zertteý medıtsına ortalyǵy ashyldy, dep habarlaıdy QazAqparat.
Sidra Medicine jańa medıtsınalyq ortalyǵyn Katar bilim berý, ǵylym jáne qoǵamdyq damý qorynyń tóraǵasy Sheıha Moza bınt Nasser ashty.
Sheıha Moza Dohada Education City ǵylymı tehnoparki men ýnıversıtet qalashyǵynyń negizin qalaǵan. Onyń pikirinshe, Sidra Medicine - medıtsına salasyndaǵy erekshe jańalyq jáne Katar Memleketiniń ınnovatsııalyq densaýlyq saqtaý salasyn qamtamasyz etýdegi kezekti jetistik.
Osyndaı biregeı akademııalyq medıtsına mekemesinde AQSh, Ulybrıtanııa, Frantsııa jáne basqa da 100 elden kelgen 4 myń jumysshymen qosa, mýzykanttar da bar. Sebebi, ǵalymdardyń pikirinshe, mýzyka tıimdi kómekti terapııa sanalady.
Keshendi tanymal argentınalyq sáýletshi Sezar Pellı salǵan. Ol Kýala-Lýmpýrdaǵy Petronas munaralarynyń jáne Nıý-Iorktegi Dúnıejúzilik qarjy ortalyǵynyń avtory.
«Sidra Medicine - bilim, jańalyqtar jáne densaýlyqtyń jańa shamshyraǵy. Sheıha Mozanyń basshylyǵynyń arqasyndamol tabystarǵa qol jetkizdik. Munda bilikti dárigerler men jahandyq deńgeıdegi bedeldi ǵalymdar birlesip jumys isteıdi», - dep atap ótti Sidra Medicine bas dırektory Pıter Morrıs.
Qazaqstandyq dárigerler Sidra Medicine ortalyǵyndaǵy balalar kardıology, nevrolog, ýrolog, hırýrg jáne basqa da mamandarmen baılanys ornatty.
