Qatarda Qazaqstan azamattaryna jumysqa ornalasý jeńildeıdi
ASTANA. KAZINFORM — Búgin Parlament Májilisiniń jalpy otyrysynda «Qazaqstan Úkimeti men Qatar Úkimeti arasyndaǵy Qazaqstannan kelgen jumyskerlerdi Qatarda jumysqa ornalastyrýdy retteý týraly kelisimdi ratıfıkatsııalaý týraly» zańy qabyldandy.
Qujattyń maqsaty — 2024 jylǵy 14 aqpanda Doha qalasynda qol qoıylǵan Qazaqstan Respýblıkasynyń Úkimeti men Qatar Memleketiniń Úkimeti arasyndaǵy Qazaqstan Respýblıkasynan kelgen jumyskerlerdi Qatar Memleketinde jumysqa ornalastyrýdy retteý týraly kelisimdi ratıfıkatsııalaý.
Bul turǵyda Qazaqstan azamattarynyń Qatardaǵy quqyqtyq jáne áleýmettik qorǵalýyn qamtamasyz etý eskerilgen.
— Ol úshin mynadaı aıqyn rásimder belgilenedi: irikteý, qazaqstandyq azamattardy jumysqa qabyldaý jáne olardyń Qatarda jumysqa ornalasý kezindegi quqyqtaryn aıqyndaý. Kelisimge qosymsha retinde qazaqstandyq azamattardy Qatarda jumysqa qabyldaýǵa arnalǵan úlgilik eńbek sharty bekitilgen. Bul eńbek shartynyń erejelerine qandaı da bir ózgerister engizýge Qatardaǵy jumys berýshiniń quqyǵy joq, — dedi Eńbek jáne halyqty áleýmettik qorǵaý mınıstri Svetlana Jaqypova.
Úlgilik eńbek shartynda jumys berýshiniń:
— turǵyn úı berý nemese turýǵa járdemaqy tóleý;
— jumys ornyna deıin jáne keri qaıtý úshin tegin kólik usyný nemese kólik járdemaqysyn tóleý;
— Qatar zańnamasyna sáıkes medıtsınalyq qyzmet kórsetý;
— jyl saıynǵy demalysty qosa alǵanda, jumysqa ornalasý jáne eńbek shartynyń aıaqtalýy kezinde áýe kóligine aqy tóleý boıynsha jumyskerdi qamtamasyz etý mindetteri kózdelgen.
Qatardyń Eńbek mınıstrligi eńbek daýlaryn sheshýge qatysty tıisti is-sharalardy atqaryp jatyr. Eger bul daýlar yntymaqtastyq tártibinde sheshilmese, is sotqa beriledi.
— Kelisimniń oryndalýyn úılestirý maqsatynda Qazaqstan Respýblıkasynyń Eńbek mınıstrligi men Qatar Memleketiniń Eńbek mınıstrligi ókilderinen birlesken komıtet qurylady. Qatar Memleketi atalǵan Kelisimdi ratıfıkatsııalaý jumystarynyń aıaqtalǵany týraly 2024 jylǵy 29 qarashada habarlady, — dedi mınıstri.
Budan buryn habarlanǵandaı, bıyl mamyr aıynda Qatarda Qazaqstan azamattaryn jumysqa ornalastyrýdyń tártibi retteletinin jazǵan edik.