Qatardaǵy Qazaqstan azamattary negizinen qaı salalarda jumys istep júr

ASTANA. KAZINFORM — Qazir Qatarda 800-den astam Qazaqstan azamaty jumys istep júr. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti. 

Búgin Májilistiń jalpy otyrysynda depýtattar «Qatarǵa baratyn eńbek mıgranttarynyń sanyna qatysty kvota belgilene me?» dep surady.

Óz kezeginde Svetlana Jaqypova kvota bolmaıtynyn atap ótti.

— Qazir Qatarda 800-den astam Qazaqstan azamaty jumys istep júr. Taldaý barysynda olar negizinen munaı-gaz sektorynda, qyzmet kórsetý salasynda qamtylǵany anyqtaldy. Olardyń arasynda er adamdar 60 paıyz bolsa, al qalǵany áıelder. Elimizden baratyn adamdarǵa qatysty kvota bolmaıdy, — dedi Eńbek mınıstri.

Aıta keteıik, búgin Májilistiń jalpy otyrysynda «Qazaqstan Úkimeti men Qatar Úkimeti arasyndaǵy Qazaqstannan kelgen jumyskerlerdi Qatarda jumysqa ornalastyrýdy retteý týraly kelisimdi ratıfıkatsııalaý týraly» zań jobasy talqylanyp jatyr. Qujattyń maqsaty — Qazaqstan azamattarynyń Qatardaǵy quqyqtyq jáne áleýmettik qorǵalýyn qamtamasyz etý.

Budan buryn habarlanǵandaı, Syrtqy ister mınıstriniń orynbasary Álibek Baqaev Qatarǵa qazir 1,5 myń Qazaqstan azamaty Qatarda júrgenin aıtty.