Qatarda Messıge arnalǵan 27 metrlik mýral paıda boldy
ASTANA. KAZINFORM — Qatardyń Ál-Ýakra qalasynda 2022 jylǵy fýtboldan álem chempıonatynda Argentına quramasynyń jeńisine arnalǵan alyp mýral salyndy. Onda tarıhı fınaldan keıin Lıonel Messıge marapat tabystaý sáti beınelengen, dep habarlaıdy Kazinform agenttigi Anadolu-ǵa silteme jasap.
Mýral «Argentına oramy» atalyp ketken Barahat ál-Janýb aýdanynda ornalasqan. Onda Qatar ámiri sheıh Tamım ben Hamad Ál Tanı Argentına quramasynyń kapıtany Lıonel Messıge álem chempıonatynyń kýbogyn tabystaý aldynda dástúrli arab shapany — bısht kıgizgen sát beınelengen.
Argentınalyq sýretshi Martın Ron men qatarlyq sýretshi Mýbarak ál-Malıktiń birlesken jumysy 2024 jyly aıaqtaldy. Mýraldyń eni — 27 metr, bıiktigi — 11 metr, al jalpy aýdany — shamamen 297 sharshy metr. Onda Messı men Qatar ámirinen bólek, FIFA prezıdenti Djannı Infantıno men álem chempıonatynyń kýbogy da beınelengen.
«Lýsaıl stadıonyndaǵy sıqyrly tún» dep atalatyn týyndy Argentına quramasynyń sporttyq jeńisin ǵana emes, eki eldiń mádenı jaqyndasýyn da bildiredi.
2022 jylǵy álem chempıonaty kezinde Barahat ál-Janýb aýdany argentınalyq jankúıerlerdiń negizgi turaqtaǵan oryndarynyń birine aınaldy. Kók-aq jalaýlar men fýtbol atrıbýtıkasynyń kóptigine baılanysty bul aýdanǵa «Argentına oramy» degen ataý berildi. Mýral jobasy Barwa qurylys kompanııasynyń qoldaýymen júzege asyryldy.
Eske salaıyq, 2022 jylǵy 18 jeltoqsanda Lýsaıl stadıonynda ótken álem chempıonatynyń fınalynda Argentına quramasy Frantsııany penaltı serııasynda 4:2 esebimen jeńdi. Negizgi jáne qosymsha ýaqyt 3:3 esebimen aıaqtalǵan edi.
Argentına quramasy tarıhynda úshinshi ret álem chempıony atandy. Al Lıonel Messı mansabynda alǵash ret fýtboldan álem chempıonatynyń bas júldesin ıelendi. Týrnır qorytyndysy boıynsha ol úzdik oıynshyǵa beriletin «Altyn dop» syılyǵyn da aldy.
Qatar ámiri marapattaý rásiminde Messıge kıgizgen dástúrli arab shapany — bısht eldiń mádenı murasynyń bir bóligi bolyp esepteledi. Ony ádette resmı is-sharalar men saltanatty jıyndarda kıedi.
Bul ulttyq mádenıet elementi 2027 jyly Dohada 27 tamyz ben 12 qyrkúıek aralyǵynda ótetin basketboldan álem chempıonatynyń logotıpine de engizilgen.
Buǵan deıin Argentına quramasynyń kapıtany Lıonel Messı 39 jasynda ulttyq qurama sapyndaǵy mansabyn aıaqtaıtynyn málimdegen edi.
Keıinirek Messı Argentına quramasy sapynda sońǵy oıynyn ótkizdi.
Sondaı-aq Lıonel Messıdiń Ispanııanyń ekinshi dıvızıonynda óner kórsetetin «Eldense» klýbynyń ıesi atanǵany belgili boldy. 1921 jyly qurylǵan klýb dástúrli kók-qyzyl tústerin saqtap keledi. Jańa ıesi aýysqannan keıin komanda óz tarıhy men dástúrin saqtaı otyryp, damýyn jalǵastyrýdy kózdep otyr.
