Qatarda Qazaqstannyń mádenıet kúnderi ótedi
ASTANA. KAZINFORM — 4-7 aqpan aralyǵynda Doha qalasynda Qazaqstan Respýblıkasynyń mádenıet kúnderi ótetin boldy, dep habarlaıdy Mádenıet jáne aqparat mınıstrliginiń baspasóz qyzmeti.
Atalǵan mádenı is-shara Prezıdent Qasym-Jomart Toqaevtyń Qatar memleketine jasaǵan memlekettik sapary barysyndaǵy Memleket basshylarynyń ýaǵdalastyqtary aıasynda ótkiziledi. Baǵdarlama Qazaqstan men Qatar arasyndaǵy mádenı-gýmanıtarlyq yntymaqtastyqty odan ári nyǵaıtýǵa, sondaı-aq ulttyq mádenıetti halyqaralyq deńgeıde keńinen tanytýǵa baǵyttalǵan.
— Negizgi is-sharalar Doha qalasyndaǵy «Darb Al-Sagı» mádenı-tarıhı ortalyǵynda ótedi. Baǵdarlamada gala-kontsert, taqyryptyq kontsertter, kórmeler men aǵartýshylyq is-sharalar uıymdastyrylyp, Qazaqstannyń dástúrli jáne zamanaýı óneri tanystyrylady. Atap aıtqanda, ulttyq mýzyka men horeografııa, qoldanbaly jáne beıneleý óneri, sahnalyq mádenıet elementteri men ulttyq kıim úlgileri usynylady, — delingen habarlamada.
Qazaqstan Respýblıkasynyń Mádenıet jáne aqparat mınıstrligi uıymdastyratyn mádenıet kúnderi sheńberinde birqatar mazmundy is-shara ótkizý josparlanǵan.
4 aqpan kúni Qazaqstan óner sheberleriniń qatysýymen gala-kontsert ótedi. Kontsertte Qurmanǵazy atyndaǵy Qazaq ulttyq konservatorııasynyń qazaq halyq aspaptary orkestri men «Birlik» bı ansambli óner kórsetedi. Vokalıster qatarynda Qazaqstannyń halyq ártisi Álisher Kárimov, Qazaqstannyń eńbek sińirgen qaıratkerleri Medet Shotabaev, Zarına Altynbaeva jáne Marııa Mýdrıak, «Daryn» memlekettik jastar syılyǵynyń laýreattary Asqar Muqııat, Rýhııa Baıdúkenova, Rasýl Jarmaǵambetov, Nazym Saǵyntaı jáne ózge de belgili mádenıet qaıratkerleri bar. Kontserttik baǵdarlamada qazaq halqynyń klassıkalyq mýzykalyq muralary, halyq kúıleri men ánderi, sondaı-aq sımfonııalyq óńdeýdegi zamanaýı shyǵarmalar oryndalady.
6 aqpan kúni «Joshy» etno-folklorlyq ansambliniń jeke kontserti ótedi. Óner ujymy halyq ánderi men kúılerin dástúrli aspaptarda jáne zamanaýı óńdeýde oryndaıdy.
Sonymen qatar mádenıet kúnderi aıasynda ulttyq dástúrler men sport túrlerin nasıhattaýǵa aıryqsha mán beriledi.
Іs-sharalarǵa Qazaqstannyń belgili mádenıet jáne óner qaıratkerleri, shyǵarmashylyq ujymdar, dástúrli óner sheberleri, qolónershiler men aspazdar qatysady. Kórermen úshin ulttyq mádenı mura men eldiń shyǵarmashylyq áleýetin tereńirek tanytýǵa baǵyttalǵan tanystyrylymdar men sheberlik sabaqtary uıymdastyrylady.
Osydan buryn QR Qarýly kúshteriniń Ulttyq áskerı-patrıottyq ortalyǵynyń Ortalyq áskerı orkestri Qatarda ótken I halyqaralyq áskerı mýzyka jáne marshtar festıvaline qatysqanyn jazǵanbyz.