Qatarda qazaqstandyq munaıshylarǵa suranys artýy múmkin

ASTANA. KAZINFORM — QR Eńbek jáne halyqty áleýmettik qorǵaý birinshi vıtse-mınıstri Asqarbek Ertaev Qatar memleketinde Qazaqstannyń munaıshylaryna suranys artýy múmkin ekenin aıtty.

- Qatarda jumysqa ornalasardyń aldynda, sol eldegi jumys berýshiniń suranysyn qaraý kerek. Qatardaǵy jumys berýshilerdiń kóbisi munaı-gaz salasynan. Sondyqtan olar bul saladaǵy bilikti mamandardy izdep jatady. Bul baǵytta jumys isteýge qaýqary bar Qazaqstan azamattary óz ótinimin bere alady. Osy oraıda Shyǵys Qazaqstan, Túrkistan jáne Almaty oblystarynda oqytý ortalyqtaryn jasaqtadyq. Eger jyl basynda Qatar jaǵynan jumys berýshiler kerek mamandardyń tizimin joldasa, portal arqyly elimizden baratyn adamdar daıyndalady, - dedi A. Ertaev Senatta tilshiler suraǵyna jaýap bere otyryp.

Onyń aıtýynsha, Qatar memleketi jumysshylardy kvota boıynsha qabyldaıdy.

- Biz Qazaqstan azamattaryna Qatardyń zańnamasyna, tártibine qatysty tolyq málimet beremiz. Osy daıyndyqtan keıin, jumysshylar sol elge attanady. Búgin tıisti zańdy Senat maquldady. Keler jyldan osy baǵyttaǵy jumystar bastalady, - dedi vıtse-mınıstr.

Budan buryn habarlanǵandaı, búgin Senattyń jalpy otyrysynda «Qazaqstan Úkimeti men Qatar Úkimeti arasyndaǵy Qazaqstan Respýblıkasynan kelgen jumyskerlerdi Qatar Memleketinde jumysqa ornalastyrýdy retteý týraly kelisimdi ratıfıkatsııalaý týraly» Zańy maquldandy.