Qatarda Qazaqstan azamattaryn jumysqa ornalastyrýdyń tártibi retteledi

ASTANA. KAZINFORM – Parlament Májilisiniń qaraýyna «Qazaqstan Úkimeti men Qatar Úkimeti arasyndaǵy Qazaqstannan kelgen jumyskerlerdi Qatarda jumysqa ornalastyrýdy retteý týraly kelisimdi ratıfıkatsııalaý týraly» zań jobasy kelip tústi.

- Zań jobasy Qatarda Qazaqstan azamattaryn jumysqa ornalastyrý máselelerin retteıdi. Eńbek shartyn jasaýdan bastap, repatrıatsııalaý máselelerine deıingi barlyq kezeńderde qazaqstandyqtardy keshendi quqyqtyq qorǵaýǵa baǵyttalyp otyr. Qazaqstannan kelgen jumysshylardy jaldaý, olardyń Qatarǵa kirýi jáne onda jumysqa ornalasýy tıisti zańdarmen, sondaı-aq eki elde de qoldanylatyn rásimdermen retteledi. Májilistiń Áleýmettik-mádenı damý komıteti zań jobasy boıynsha qorytyndy ázirleýge daıyn, - dedi depýtat Ashat Aımaǵambetov Májilistiń jalpy otyrysynda.

Eske salsaq, bıyl sáýir aıynda Eńbek jáne halyqty áleýmettik qorǵaý mınıstri Svetlana Jaqypova Ońtústik Koreıadaǵy Qazaqstan azamattarynyń zańdy jumys isteýine jaǵdaı jasaý múmkindigine túsinik berdi.