Katar jasyl tehnologııany damytýda Qazaqstanmen birge jumys isteýge daıyn
ASTANA. QazAqparat - Katar jasyl tehnologııany damytýda Qazaqstanmen birge jumys isteýge daıyn. Bul týraly búgin Katardyń Syrtqy ister mınıstri Soltan Bın Saad Ál-Mýraıhı málim etti, dep habarlaıdy QazAqparat.
«Katar munaı men gazǵa baı el ekendigine qaramastan balamaly energertııka men joǵary tehnologııa máselelerine aıryqsha nazar aýdarady. Biz jasyl tehnologııany damytýda Qazaqstanmen birge jumys isteýge daıynbyz jáne ózara tıimdi seriktestik qatynas qurýdan úmitimiz bar», - dedi ol búgin EKSPO-2017 halyqaralyq mamandandyrylǵan kórmesi aıasynda Katardyń Ulttyq kúnine arnalǵan saltanatty sharada.
Sonymen qatar Soltan Bın Saad Ál-Mýraıhı shól daladaǵy shaǵyn memlekettiń qysqa ýaqyttyń ishinde ǵana ekonomıkalyq kórsetkishteri joǵary aldyńǵy qatarly memleketke qalaı aınalǵanyn aıtyp berdi.
Qazaqstan tarapynan saltanatty sharaǵa qatysqan QR Ulttyq ekonomıka vıtse-mınıstri Qazaqstan men Katar arasyndaǵy belsendi yntymaqtastyq jyldarynda ornyqty qarym-qatynas ornaǵanyn ári qazirgi ýaqytta barlyq salada ózara baılanysýǵa tolyq jaǵdaı jasalǵanyn atap ótti.
Eki eldiń memlekettik týlary kóterilip, ánurany oınalǵan negizgi sharadan keıin Taıaý Shyǵystaǵy tanymal ansamblderdiń biri «Maqam Ensemble» ujymy óner kórsetti. Bul ujym arab óneriniń rýhy men erekshelikterin saqtaı otyryp, klaıssıkalyq arab mýzykasyna zamanaýı ınterpretatsııada oryndaýǵa mashyqtanǵan.
