Qazaqstan men Qatar avıatsııalyq bılikteri jańa deńgeıdegi yntymaqtastyqty qolǵa aldy
ASTANA. KAZINFORM — IKAO Assambleıasynyń 42 sessııasy aıasynda Qazaqstan Respýblıkasy delegatsııasynyń basshysy, Kólik mınıstrliginiń Azamattyq avıatsııa komıtetiniń tóraǵasy Saltanat Tompıeva Katar Memleketi delegatsııasynyń basshysy, Katar Memleketiniń Azamattyq avıatsııa basqarmasynyń Prezıdenti Mohammed ben Faleh Ál-Hadjrımen kezdesý ótkizdi. Bul týraly Kólik mınıstrligi málimdedi.
Taraptar azamattyq avıatsııa salasyndaǵy ekijaqty yntymaqtastyqtyń ózekti baǵyttaryn talqylady. Sondaı-aq, taraptar ushý qaýipsizdigi, avıatsııalyq qaýipsizdik, kadrlardy daıarlaý jáne elder arasyndaǵy tikeleı reıster sanyn arttyrý salalarynda yntymaqtastyqty keńeıtýge qyzyǵýshylyq tanytty.
Kezdesý barysynda S. Tompıeva: «Keńeıtilgen quqyqtyq baza bizdiń elder arasyndaǵy yntymaqtastyqty nyǵaıtýǵa múmkindik berdi. Nátıjesinde Qatar Airways Almatyǵa reıster sanyn eki esege deıin arttyryp, Qazaqstan jolaýshylaryna Doha arqyly jáne áýe kompanııasynyń reısterimen búkil álem boıynsha saıahat jasaýǵa jaǵdaı jasady. Astanaǵa reısterdiń ashylýy bizdiń elder arasyndaǵy yntymaqtastyqty nyǵaıtyp, Qatar Airways kompanııasyna da paıda ákeletinine senimdimiz», — dedi.
Kezdesý aıasynda avıatsııalyq kadrlardy oqytý jáne daıarlaý salasyndaǵy yntymaqtastyq máseleleri de talqylandy. Ásirese áýe dıspetcherlerin oqytý jáne osy salada bilikti mamandar daıarlaýǵa erekshe nazar aýdaryldy.
Eki memlekettiń avıatsııalyq bılik basshylarynyń kezdesýi Kanadanyń Monreal qalasynda ótip jatqan Halyqaralyq azamattyq avıatsııa uıymy (IKAO) Assambleıasynyń 42-sessııasy aıasynda boldy.
Qazaqstan men Katardyń áýe kompanııalary aptasyna 38 reıs oryndaý quqyǵyna ıe: aptasyna 14 reıs Astana-Doha baǵytynda, aptasyna 14 reıs Almaty-Doha baǵytynda, sondaı-aq aptasyna 10 júk reısi eki taraptyń kez kelgen pýnktine deıin oryndalýy múmkin. Bul rette Qazaqstanda engizilgen «ashyq aspan» rejımi aıasynda áýe erkindiginiń besinshi dárejesin paıdalaný quqyǵy beriledi. Qazirgi tańda Qazaqstan men Katar arasynda Air Astana, SCAT jáne Qatar Airways áýe kompanııalary aptasyna 13 turaqty jáne 7 turaqsyz reıs oryndap otyr.
Aıta keteıik, Qazaqstan IKAO Assambleıasynda 33 avıatsııalyq bastamany alǵash ret usyndy.