Qatar Pentagonǵa Tramp úshin eshqandaı shartsyz ushaq syılady

ASTANA. KAZINFORM — Taraptar Boeing 747-8 ushaǵyn «sózsiz berý» týraly kelisimge qol qoıýy sebebimen AQSh Qatarǵa ushaq úshin eshteńe tólemeıdi, dep habarlaıdy CNN. 

7 shildede AQSh Qorǵanys mınıstri Pıt Hegset pen Qatar premer-mınıstriniń orynbasary jáne qorǵanys isteri jónindegi memlekettik mınıstri Saýd ben Abdel Rahman Ál Tanı qol qoıǵan qujatta prezıdent Donald Tramp jańartylǵannan keıin Air Force One retinde paıdalanylady dep kútiletin ushaqtyń Qorǵanys mınıstrligine «izgi nıetpen berilgen syılyq» ekeni aıtyldy.

— Bul qaıyrymdylyq jaqsy nıetpen jáne taraptar arasyndaǵy yntymaqtastyq pen ózara qoldaý rýhynda jasaldy. Osy ózara túsinistik týraly memorandýmdaǵy eshnárse para alý, zańsyz yqpal etý nemese sybaılas jemqorlyqtyń kez kelgen nysanyn usyný, ýáde etý nemese qabyldaý bolyp tabylmaıdy nemese túsindirilmeıdi — delingen kelisimde.

Qatar ushaǵyn jańǵyrtýdyń resmı quny qupııalanǵan. Biraq AQSh áýe kúshteriniń basshysy Troı Maınke ótken aıda zań shyǵarýshylarǵa shyǵyn 400 mln dollardan az bolatynyn málimdedi.

Ushaqtyń kóktemde berilýi saıası ortada daý týdyrdy, demokrattar men birneshe yqpaldy respýblıkashylar, sonyń ishinde prezıdenttiń jaqtastary etıkalyq negizde yqtımal kelisimge qarsy ekenin málimdedi. 

The New York Times gazeti bir kún buryn Pentagon AQSh prezıdentine syıǵa tartý etilgen Katar ushaǵyn jańartýǵa ıadrolyq baǵdarlamalardy jańǵyrtýǵa bólingen 934 mln dollardy áskerı bıýdjetke aýdarǵanyn habarlady. 

Sarapshylardyń baǵalaýynsha, Donald Tramp ózine syılyqqa berilgen ushaqty jaqyn arada paıdalana almaıdy. Ushaqty sońǵy baılanys jáne ushý kezinde qorǵanys tehnologııalarymen qaıta jabdyqtaý bir jyldan eki jylǵa deıin sozylýy múmkin.

Buǵan deıin Aq úı Qatar koroldik otbasymen Boeing 747 lıýks ushaǵyn prezıdenttik bort (Air Force One) retinde paıdalaný úshin AQSh-qa berý týraly kelissóz júrgizip jatqanyn jazǵan edik.