Qatar ortalyq banki qarjy sektoryn qoldaýǵa arnalǵan aldyn alý sharalaryn jarııalady

ASTANA. KAZINFORM - Qatardyń qarjy retteýshisi bankterdiń ótimdilikke qoljetimdiligin keńeıtip, qaryz alýshylarǵa tólemderdi keıinge shegerý múmkindigin bermek, dep habarlaıdy Kazinform agenttiginiń menshikti tilshisi.

Qatar ortalyq banki qazirgi jaǵdaı aıasynda bank sektoryndaǵy ótimdilikti saqtaý jáne qarjy naryǵynyń turaqty jumysyn qamtamasyz etýge baǵyttalǵan aqsha-nesıe saıasaty sharalarynyń keshenin engizgenin málimdedi.

Qabyldanǵan sharalar aıasynda retteýshi tıisti talaptarǵa jaýap beretin qundy qaǵazdardy kepilge ala otyryp, ulttyq valıýtada repo operatsııalaryna shekteýsiz jumys isteýge múmkindik beredi. Bul qadam bank júıesinde jetkilikti ótimdilik deńgeıin qamtamasyz etýge baǵyttalǵan.

Sonymen qatar qoldanystaǵy «overnaıt» operatsııalaryna qosymsha retinde merzimi úsh aıǵa deıingi jańa repo quraly iske qosylady. Bul bankterge qysqa merzimdi ótimdilikti basqarýdy ıkemdi júrgizýge múmkindik beredi.

Osyǵan qosa, ortalyq bank depozıtter boıynsha mindetti rezerv normasyn 4,5%-dan 3,5%-ǵa deıin tómendetý týraly sheshim qabyldady. Retteýshiniń baǵalaýynsha, bul bankterdiń ekonomıkany qarjylandyrý múmkindigin keńeıtedi.

Jeke sharalar blogy qaryz alýshylardy qoldaýǵa baǵyttalǵan. Retteýshi bankterge qazirgi jaǵdaıdan zardap shekken klıentterge tólemderdi úsh aıǵa deıin keıinge shegerýge ruqsat berdi.

Buǵan deıin BAÁ ortalyq banki bank sektoryn turaqtandyrýǵa baǵyttalǵan sharalar paketin qabyldaǵan bolatyn.