Qatar men Qazaqstan qatynasy qarqyndy damyp keledi – sheıh Halıf bın Djasım Ál Tánı
DOHA. KAZINFORM – Qatar saýda-ónerkásip palatasynyń tóraǵasy sheıh Halıf bın Djasım Ál Tánıdiń aıtýynsha, Qazaqstanmen qarym-qatynas qarqyndy damyp keledi.
«Qatar ámiri sheıh Djasım ben Muhammed ben Támıdiń Qazaqstanǵa sońǵy saparynan keıin Qatar men Qazaqstan qatynasy qarqyndy damyp keledi. Ózara túsinistik týraly kóptegen memorandýmǵa qol qoıyldy. Búgingi kezdesýde ózge de ınvestıtsııalyq kelisimder rásimdeldi», - dedi Qatar saýda-ónerkásip palatasynyń tóraǵasy.
Onyń atap ótýinshe, Qatar men Qazaqstan arasyndaǵy qatynas óte jedel damý ústinde. Bul oraıda ol Qazaqstandaǵy qatarlyq ınvestıtsııanyń molynan bolǵanyn, al Qatarǵa qazaqstandyq ınvestorlar leginiń artqanyn qalaıtyndyǵyn aıtady.
«Búgin tańerteń Qatar men Qazaqstan Úkimetteriniń arasynda munaı men gazdy, qubyr jelilerin, elektr stansalary men aýrýhanalardy qosa alǵanda kóptegen sektorǵa ınvestıtsııa týraly kelisimniń rásimdelgenine kýá boldyq», - dedi ol.
Spıkerdiń atap ótýinshe, munyń bári eki el arasyndaǵy ınvestıtsııalyq qatynastardyń artýyna septigin tıgizedi. Sonymen qatar sheıh Qazaqstannyń Qatarǵa dostyq peıildegi úlken memleket ekendigine, aýyl sharýashylyǵy, ónerkásip, munaı-gaz sektory salalaryndaǵy yntymaqtastyqqa mol múmkindik bar ekendigine aıryqsha nazar aýdartty.
«Búgin tańerteń qol qoıylǵan barlyq memorandým yntymaqtastyǵymyzǵa negiz qalaıdy. Tipti, onyń keıbiri búginde qoldanystaǵy kelisimshart ta sanalady. Taıaý jyldardyń ishinde onyń nátıjesin kóretindigimizge úmittenemiz. Munan bólek, bul kelisimderdiń taıaý ýaqytta júzege asyrylatyndyǵynan úmittenemin», - dedi Halıf bın Djasım Ál Tánı.
Aıta ketsek, Prezıdent Qasym-Jomart Toqaev pen Qatar Ámiri birqatar qujatqa qol qoıdy.
