Qatar men Indonezııa quny 4 mıllıard dollar turatyn birlesken qor qurmaqshy

ASTANA.KAZINFORM - Qor Ońtústik-Shyǵys Azııa elderiniń ekonomıkasyna ınvestıtsııa tartýǵa arnalǵan, dep habarlaıdy Kazinform  menshikti tilshisi.

Indonezııanyń ulttyq ál-aýqat qory Danantara Indonesia Qatar ınvestıtsııalyq basqarmasymen 4 mıllıard dollarlyq birlesken ınvestıtsııalyq qor quratynyn jarııalady, dep habarlady Indonezııa tarapy seısenbi kúni málimdemesinde.

Málimdemege sáıkes, taraptardyń árqaısysy - Indonezııa men Katar 2 mıllıard dollardan beredi. Birlesken qor Ońtústik-Shyǵys Azııadaǵy eń iri ekonomıka kózi Indonezııaǵa ınvestıtsııa salýǵa baǵyttalady.

Investıtsııalar eń aldymen ulttyq shıkizat óńdeýshi salalarǵa baǵyttalady. Sonymen qatar, jańartylatyn energııa kózderi, densaýlyq saqtaý, basqa da perspektıvaly salalar, sonyń ishinde tehnologııa salasyndaǵy jobalarǵa nazar aýdarylady.

Bul kelisimge Indonezııa men Qatar basshylarynyń Dohaǵa sapary kezinde qol jetkizildi. Indonezııa prezıdenti Prabovo Sýbıanto qazir aımaqpen ekijaqty baılanysty nyǵaıtý úshin BAÁ, Túrkııa, Mysyr, Qatar jáne Iordanııany aralap júr.

Indonezııalyq tarap bul kelisim Taıaý Shyǵys seriktesteriniń aımaq ekonomıkasyna ósip kele jatqan qyzyǵýshylyǵyn, sondaı-aq eldiń turaqty jáne uzaq merzimdi sheteldik ınvestıtsııalardy tartýǵa kúsh salýyn kórsetedi.

Ótken aptada Abý-Dabıde ornalasqan Emırattyń taza energııamen aınalysatyn Masdar kompanııasy Indonezııadaǵy qalqymaly kún energııasy jobalaryn ilgeriletý úshin Indonezııanyń PT PLN (Persero) memlekettik kommýnaldyq kásipornymen ózara túsinistik týraly eki memorandýmǵa qol qoıdy.

Indonezııanyń Gaza sektoryndaǵy palestınalyqtarǵa baspana berýge daıyn ekenin buǵan deıin habarlaǵan edik.