Qatar Memleketinde Qazaqstannyń mádenıet kúnderiniń saltanatty ashylýy ótti
ASTANA. KAZINFORM – Qatar astanasy Doha qalasynda Qazaqstan Respýblıkasynyń mádenıet kúnderi saltanatty túrde ashyldy. Bul týraly Mádenıet jáne aqparat mınıstrligi habarlady.
Aýqymdy mádenı is-sharanyń ótýi Qazaqstan Prezıdenti Qasym-Jomart Toqaevtyń Qatar Memleketine jasaǵan memlekettik sapary barysynda eki el basshylary qol jetkizgen ýaǵdalastyqtardyń nátıjesinde júzege asyryldy.
Qazaqstandyq delegatsııany Premer-Mınıstrdiń orynbasary – Mádenıet jáne aqparat mınıstri Aıda Balaeva bastap bardy. Mádenıet kúnderi aıasynda Premer-Mınıstrdiń orynbasary Qatar Memleketiniń Mádenıet mınıstri sheıh Ábdirahman ben Hamad ben Djasım Ál Tánımen ekijaqty kezdesý ótkizdi.
Kelissózder barysynda taraptar mádenıet pen óner salasyndaǵy ekijaqty yntymaqtastyqty keńeıtý perspektıvalaryn talqylap, birlesken jobalardy júzege asyrýǵa qyzyǵýshylyq bildirdi.
– Qazaqstan Respýblıkasynyń Mádenıet kúnderiniń Qatar Memleketinde ótýi biz úshin zor mártebe. Qazaqstan men Qatar halyqtaryn jaqyndastyratyn ortaq tarıhı jáne rýhanı qundylyqtar bar. Eki el de baı kóshpeli órkenıet murasyn saqtap, dástúrli mádenıetti qadirleýge aıryqsha mán beredi. Osy ortaq qundylyqtar aldaǵy ýaqytta da halyqtarymyzdy odan ári jaqyndastyryp, jańa birlesken mádenı jobalardy iske asyrýǵa berik negiz bolady dep senemin, – dedi Aıda Balaeva.
Qatar Memleketiniń Mádenıet mınıstri sheıh Ábdirahman ben Hamad ben Djasım Ál Tánı eki el qarym-qatynasynyń damý áleýeti joǵary ekenin atap ótip, birlesken mádenı jobalar yntymaqtastyqty odan ári keńeıtýdiń berik negizine aınalatynyna senim bildirdi.
Kezdesý barysynda kreatıvti sektordaǵy ózara yqpaldastyqqa erekshe nazar aýdaryldy. Aıda Balaeva Qatar Memleketinde kreatıvti ındýstrııalardyń qarqyndy damyp kele jatqanyn, Qazaqstanda da bul baǵyttyń basymdyqqa ıe ekenin atap ótti.
Respýblıkada Kreatıvti ındýstrııalardy damytý qory qurylǵan. Osyǵan baılanysty qazaqstandyq tarap birlesken jobalardy júzege asyrýǵa jáne atalǵan salada praktıkalyq yntymaqtastyqty keńeıtýge daıyn ekenin jetkizdi.
Sonymen qatar ózara yqpaldastyqtyń ózge de perspektıvaly baǵyttary aıqyndaldy. Atap aıtqanda, birlesken kitaptar shyǵarý, eki el avtorlarynyń shyǵarmalaryn qazaq jáne arab tilderine aýdarý, sondaı-aq sýretshilerdi qoldaý tetikteri boıynsha tájirıbe almasý máseleleri talqylandy.
Praktıkalyq qadam retinde atalǵan baǵyttardyń barlyǵyn qamtıtyn Vedomstvoaralyq is-sharalar josparyna qol qoıý usynyldy. Kezdesý sońynda delegatsııa basshylary Qazaqstan óner sheberleriniń merekelik gala-kontsertin tamashalady.
Kontsert baǵdarlamasynda qazaq halqynyń klassıkalyq mýzykalyq muralarynan bastap, halyq kúıleri men ánderi, sımfonııalyq óńdeýdegi zamanaýı týyndylar, sondaı-aq arab ánderi oryndaldy. Sondaı-aq delegatsııa basshylary Mádenıet kúnderiniń negizgi is-sharalary ótip jatqan Doha qalasyndaǵy «Darb Al-Sagı» mádenı-tarıhı ortalyǵyna bardy. Munda taqyryptyq kontsertter, sándik-qoldanbaly óner kórmeleri, ulttyq naqyshty zamanaýı úlgide tanytatyn dızaınerlerdiń týyndylary usynylǵan.
Baǵdarlamada Qazaqstan Ulttyq mýzeıi daıyndaǵan ekspozıtsııaǵa erekshe oryn berildi. Sonymen qatar ulttyq dástúrler men sport túrlerin keńinen nasıhattaýǵa aıryqsha mán berilip, onyń ishinde dástúrli sadaq atý óneri, saıatshylyq, sondaı-aq tazy ıtpen ań aýlaý túrleri tanystyryldy.
Aıta keteıik, Qazaqstannyń mádenıet kúnderiniń tórt kúndik baǵdarlamasy Qazaqstan – Qatar mádenı-gýmanıtarlyq yntymaqtastyǵyn odan ári nyǵaıtýǵa jáne eldiń ulttyq mádenıetin halyqaralyq deńgeıde keńinen tanytýǵa baǵyttalǵan. Sondaı-aq aldaǵy ýaqytta Qazaqstanda Qatar Memleketiniń mádenıet kúnderi ótedi.
Aıta keteıik, Kýbada shetel valıýtasynyń erkin aınalymy engizildi.