Katar Kýveıt arqyly arab memleketteriniń talabyna jaýap beredi
ASTANA. QazAqparat - Katar Kýveıt arqyly arab memleketteriniń talabyna jaýap beredi. Bul týraly búgin Katardyń Syrtqy ister mınıstri Soltan Bın Saad Ál-Mýraıhı málim etti, dep habarlaıdy QazAqparat.
«Ózderińizde bilesizder, Saýd Arabııasy, Bahreın, sonymen qatar Birikken Arab Ámirlikteri Katar tarapyna aqparattyq naýqan uıymdastyrdy. Osydan keıin Katar memleketi blokadada qalyp qoıdy. Biz memleket ámirine araaǵaıyn retindegi óz qyzmetin oryndaý múmkinshiligin berdik. Katar kez kelgen máseleni beıbit jolmen sheshýge bolatyndyǵyna senedi», - dedi ol búgin EKSPO-2017 halyqaralyq mamandandyrylǵan kórmesi aıasynda Katardyń Ulttyq kúnine oraı ótken sharadan keıin BAQ ókilderine.
Soltan Bın Saad Ál-Mýraıhı arab memleketteri Katarǵa birqatar talap qoıyp otyrǵandyǵyn eske salyp ótti.
«Bul talaptarǵa biz taıaý aralyqta araaǵaıyn bolyp otyrǵan Kýveıt arqyly jaýap beretin bolamyz. Biz barlyq odaqtastarymyzben, memlekettermen jaqsy baılanystamyz jáne ár ýaqytta da elderdi kelissózder ústeline otyryp, beıbit kelissózderge shaqyramyz. Biz suhbatqa daıynbyz. Biraq, biz kesip ótpeıtin belgili bir qyzyl syzyq ta bar jáne ony bireýlerdiń kesip ótýine de jol bermeımiz. Bul bizdiń syrtqy jáne ishki saıasatymyzǵa qatysty jaıt», - dedi Soltan Bın Saad Ál-Mýraıhı.
Esterińizge sala ketsek, osy aıdyń basynda Saýd Arabııasy, BAÁ, Bahreın, Iemen jáne Egıpet Katar memleketimen dıplomatııalyq baılanystaryn úzgen bolatyn.
