Qatar kompanııasy Qashaǵan gazyn óńdeıtin zaýyttyń 75 paıyz aktsııasyn satyp alady
ATYRAÝ. KAZINFORM – Atyraý oblysynda Qashaǵan gazyn óńdeıtin zaýyttyń qurylysy júrip jatyr. Endi Qatar kompanııasy bul zaýyttyń 75 paıyz aktsııasyn satyp alatyn boldy.
Doha qalasynda QazaqGaz, Power International Holding, KCG, HBP basshylary Qashaǵan gazyn óńdeý zaýytynyń qurylysyn jedeldetý máselesi talqylady.
«Atalǵan kompanııalar-merdigerlerdiń aktsıonerleri jobany júzege asyrý statýsy, tapsyrmalar men atalǵan jobany jedeldetý boıynsha qabyldanyp jatqan sheshimder týraly esep berdi. Qazir Power International Holding-tyń enshiles kásiporny UCC Holding tarapynan gaz óńdeý zaýytynyń 75 paıyz bóligin satyp alý týraly kelissózder aıaqtaldy. Tranzaktsııa sharttaryn kelisý protsesi bastaldy», - dep habarlady ulttyq kompanııanyń baspasóz qyzmeti.
Qatarlyq UCC Holding kompanııasy Atyraý oblysyndaǵy gaz óńdeý zaýyty jobasyna operatsııalyq baqylaý júrgizýdi qolǵa aldy. Endi bul kompanııa atalǵan joba operatory – «GPC Investment» JShS-ǵa kúrdeli qurylys boıynsha jańa atqarýshy dırektor taǵaıyndaıdy.
Sondaı-aq, taraptar birlesken úsh jobany júzege asyrýdy jedeldetý máselesin qarastyrǵan. Birinshisi – «Qashaǵan» gazyn óńdeıtin zaýyt jobasy. Onyń qýaty 2,5 mlrd tekshe metrdi quraıdy. Ekinshisi – «Beıneý-Bozoı-Shymkent» magıstraldy gaz qubyrynyń ekinshi tarmaǵynyń qurylysy, al, úshinshisi – «Aqtóbe-Qostanaı KS-14» jobasy.
Eske sala ketelik, budan buryn Qashaǵan gazyn óńdeıtin zaýyt 2026 jyly iske qosylatynyn jazǵan bolatynbyz.