Katar Qazaqstanǵa 9 tonna gýmanıtarlyq kómek jiberdi
«Katar Ámiri uly mártebeli sheıh Tamım ben Hamad Ál-Tánıdiń tapsyrmasyn oryndaý maqsatynda búgin katarlyq áýe jelisimen gýmanıtarlyq-medıtsınalyq kómek tıelgen charterlik reıs keldi. Bul kómektiń Qazaqstan Úkimetine koronavırýstyq ınfektsııany jeńýge kómektesedi dep úmittenemin. Jalpy salmaǵy 9 tonna bolatyn kómekte maska, halat, qorǵanys quraldary bar», - dedi Qazaqstan Respýblıkasyndaǵy Katar elshisi Abdýlazız ben Sýltan Al-Rýmeıhı Nur-Sultan áýejaıynda.
Elshi Katardyń birqatar elderge gýmanıtarlyq kómek kórsetip jatqanyn jetkizdi.
QR Syrtqy ister mınıstrligi Taıaý, Orta Shyǵys jáne Afrıka departamentiniń dırektory Erjan Muqashtyń aıtýynsha gýmanıtarlyq júkte dárilik zattar men preparattar joq. Katardyń kómek jiberetini týraly aqparat úsh kún buryn belgili bolǵan.
«Ýaǵdalstyq boıynsha gýmanıtarlyq kómekti kútip alamyz. Bul úshin Katarǵa alǵys aıtamyz. Katar - elimizge kómek kórsetken Arab elderi arasyndaǵy ekinshi memleket. Bir aı buryn Birikken Arab Ámirlikteri gýmanıtarlyq kómek jibergen edi. Kómek qazaqstandyq taraptyń ótinishimen beriledi», - dedi E. Muqash.
Gýmanıtarlyq kómekti QR Densaýlyq saqtaý mınıstrligi men «SQ-Farmatsııa» JShS ókilderi qarsy aldy jáne elimizdiń medıtsınalyq uıymdaryna taratylady.
