Qatar Irannyń 6 mlrd dollar kólemindegi aktıvin qaıtarady
ASTANA. KAZINFORM — Iran men Qatar Qatarda saqtaýly turǵan Irannyń 12 mlrd dollar kólemindegi aktıviniń 6 mlrd dollaryn buǵattan shyǵarý týraly kelisimge keldi, dep habarlaıdy Armenpress.
Bul týraly Iran Islam Respýblıkasynyń prezıdenti Masýd Pezeshkıan málimdedi.
— Qol jetkizilgen kelisimge sáıkes, Qatarda saqtaýly turǵan Irannyń jalpy kólemi 12 mlrd dollar bolatyn qarajatynyń 6 mlrd dollary buǵattan shyǵarylyp, elge qaıtarylady. Sonymen qatar qalǵan qarajatty qaıtarý boıynsha qajetti jumystar jalǵasyp jatyr, — delingen prezıdenttiń baspasóz qyzmeti taratqan habarlamada.
20 maýsymda The Wall Street Journal basylymy AQSh pen Qatar Irannyń buǵattalǵan aktıvteriniń bir bóligin gýmanıtarlyq taýarlardy satyp alýǵa paıdalaný tetigin ázirlep jatqanyn habarlaǵan bolatyn.
Basylymnyń málimetinshe, alǵashqy kezeńde Tegeran Qatarda saqtalǵan 6 mlrd dollar kólemindegi aktıvke qol jetkizýi múmkin.
Eske salaıyq, AQSh pen Iran arasyndaǵy kezekti ózara shabýyldardan keıin taraptar áskerı is-qımyldy toqtatýǵa kelisken edi. Kelisimge sáıkes, 30 maýsymǵa deıin shabýyl jasalmaıdy. Osy kúni Qatarda Ormýz buǵazyndaǵy keme qatynasyna qatysty másele talqylanady.
