Qatar Irannan keltirilgen shyǵyn úshin ótemaqy talap etip jatyr
ASTANA. KAZINFORM — Qatar Syrtqy ister mınıstrligi Irannyń áreketterin zańsyz ári halyqaralyq jaýapkershilikke ákep soǵatyn qadamdar retinde baǵalady, dep habarlaıdy Kazinform agenttiginiń menshikti tilshisi.
Qatardyń syrtqy saıası vedomstvosy BUU Bas hatshysy Antonıý Gýterrıshke, sondaı-aq BUU janyndaǵy Bahreınniń Turaqty ókili jáne Qaýipsizdik Keńesiniń tóraǵasy Jamal Fares ar-Rovaıege Irannyń el aýmaǵyna jasaǵan shabýyldaryna baılanysty hat joldady.
Hattarda Iran shabýyldarynyń nysanasy azamattyq nysandar bolǵany atap ótilgen. Mundaı áreketter 1949 jylǵy Jeneva konventsııalaryn jáne olarǵa qosymsha hattamalardy, sondaı-aq halyqaralyq gýmanıtarlyq quqyq normalaryn óreskel buzý bolyp sanalady.
— Iran Islam Respýblıkasynyń zańsyz áreketteri halyqaralyq jaýapkershilikke ákeledi jáne jaǵdaıǵa qaraı Qatar memleketine keltirilgen barlyq shyǵyndy óteýdi mindetteıdi, — delingen Qatar SІM málimdemesinde.
Vedomstvo sondaı-aq shabýyldar saldarynan kelgen barlyq shyǵyn men zalaldy tıisti organdar baǵalaıtynyn atap ótti. Sonymen qatar, Qatar BUU men Qaýipsizdik Keńesin jaǵdaıdyń odan ári damýy týraly habardar etýdi jalǵastyrady.
Buǵan deıin AQSh pen Iran arasyndaǵy kelissózderdiń alǵashqy kezeńi 11 sáýirde ótetini habarlanǵan bolatyn.
Sondaı-aq BAÁ Ormýz buǵazynda keme qatynasy erkindigine kepildik berýdi talap etti.
