Qatar Irandy qaqtyǵysqa qatysy joq elderge soqqy berýdi toqtatýǵa shaqyrdy
ASTANA. KAZINFORM — Qatardyń syrtqy saıası vedomstvosynyń basshysy, sheıh Muhammed bın Abdýrrahman bın Djassım Ál Tanı Sky News arnasyna bergen suhbatynda qaqtyǵysqa úshinshi elderdiń tartylýynan saqtandyrdy. Bul týraly Kazinform agenttiginiń menshikti tilshisi Qatardyń Syrtqy ister mınıstrligine silteme jasap habarlady.
Syrtqy ister mınıstri Qatardyń Iran úshin dushpan el emes ekenin atap ótti. Onyń aıtýynsha, qaqtyǵys bastalǵanǵa deıin Parsy shyǵanaǵy elderi oǵan eshbir túrde qatyspaıtynyn aldyn ala eskertken. Sondyqtan ırandyq soqqylar kútpegen jaǵdaı bolǵan.
— Biz árdaıym Iranmen qarym-qatynasymyzdy tatý kórshilik qaǵıdatyna negizdep qurdyq. Ókinishke qaraı, Qatar men Parsy shyǵanaǵynyń basqa elderine jasalǵan soqqylardy aqtaý úshin Iran túrli syltaýlar keltirip otyr, biraq biz olardy tolyqtaı qabyldamaımyz. Bizdiń elder bul soǵystyń bir bóligi bolǵysy kelmeıdi. Eń aldymen, Iran Parsy shyǵanaǵy elderine jáne bul qaqtyǵysqa qatysy joq basqa memleketterge shabýyldaryn toqtatýy tıis, — dedi dıplomat.
Mınıstr Qatardyń buǵan deıin AQSh pen Iran arasyndaǵy dıplomatııalyq sheshimderdi izdeýge kómekteskenin eske salyp, Tegeran bıligin qaqtyǵysqa basqa elderdi tartpaýǵa shaqyrdy.
— Biz ıran halqynyń gúldengenin qalaımyz. Sońǵy oqıǵalar ekijaqty senimge úlken nuqsan keltirdi, biraq biz dıalogty jalǵastyramyz. Óıtkeni olar bizdiń kórshilerimiz. Iranǵa aıtarym — jaǵdaıdyń odan ári ýshyǵýy úshin basqa elderdi tartpaǵan jón. Eger shabýyldar jalǵasa berse, eshkim kómektese almaıdy nemese qandaı da bir dálel keltire almaıdy, óıtkeni ár memleket óz elin qorǵaýmen aınalysady, — dedi qatarlyq dıplomat.
Ol sondaı-aq AQSh-ty da shıelenisti báseńdetýge jáne barlyq taraptyń alańdaýshylyǵyn eskeretin dıplomatııalyq sheshimderdi izdeýge shaqyrdy.
Buǵan deıin Qatar Syrtqy ister mınıstrligi AQSh pen Iran arasyndaǵy shıelenistiń ýshyǵýy apatty saldarǵa ákelýi múmkin ekenin eskertken bolatyn.
Sonymen qatar, Bahreınde dron shabýylynan zardap shekkender sany 32 adamǵa deıin artqany habarlandy.
