Qatar Iran elshiliginiń eki attashesin non grata tulǵasy dep jarııalady
ASTANA. KAZINFORM — Qatar Syrtqy ister mınıstrligi olardyń elden 24 saǵat ishinde ketýin talap etti, dep habarlaıdy Kazinform menshikti tilshisi.
Qatardyń QNA jańalyqtar agenttiginiń habarlaýynsha, Qatar Syrtqy ister mınıstrligi Hattama departamentiniń dırektory keshe Iran elshisimen kezdesý ótkizip, onyń barysynda áskerı attashe jáne qaýipsizdik máseleleri jónindegi attasheni, sondaı-aq Iran elshiligi atalǵan attasheleri apparattarynyń qyzmetkerlerin non grata tulǵasy dep jarııalaǵan nota tapsyrdy.
SІM túsindirýinshe, bul sheshim Irannyń eldiń egemendigi men qaýipsizdigin buzatyn úzdiksiz shabýyldary men ashyq agressııasyna jaýap retinde qabyldandy.
Vedomstvo Iran agressııasynyń jalǵasýy Qatardyń egemendigin, qaýipsizdigin jáne múddelerin qorǵaýdy qamtamasyz etý úshin qosymsha sharalar qabyldaýǵa ákeletinin atap ótti.
Buǵan deıin álemdegi eń iri gaz jetkizýshileriniń biri QatarEnergy nysany zymyran shabýylyna ushyraǵanyn habarladyq.
Sondaı-aq Qatar Irandy qaqtyǵysqa qatysy joq elderge soqqy berýdi toqtatýǵa shaqyrǵanyn jazdyq.