Qatar Iordanııa arqyly Sırııaǵa tabıǵı gaz tasymaldamaq

ASTANA. KAZINFORM - Qatar Iordanııa arqyly Sırııaǵa tabıǵı gaz jetkizýdi josparlap otyr. Bul qadam Sırııadaǵy energııa tapshylyǵyn azaıtýǵa baǵyttalǵan qoldaý retinde qarastyrylǵan, dep habarlaıdy TRT aqparattyq agenttigi.

«SANA» Sırııa memlekettik aqparat agenttiginiń habarlaýynsha, Qatardyń Damasktaǵy ister jónindegi senimdi ókili Halıfa Abdýlla Ásh-Shárıf beısenbi kúni jasaǵan málimdemesinde bastamanyń 400 megavatt elektr energııasyn óndirýden bastalatynyn jáne Katar Damý Qory arqyly birtindep ulǵaıtylatynyn atap ótti.

– Bul qoldaý kún saıyn 2 mıllıon tekshe metr tabıǵı gaz jetkizý arqyly qosymsha 400 megavatt elektr energııasyn óndirýge múmkindik beredi, – deıdi Sırııanyń elektr energetıka mınıstri Ómer Shakrýk.

Qatar Syrtqy ister mınıstrliginiń ókili Májıd ál-Ansarı Qatardyń Sırııaǵa energetıkalyq qoldaý kórsetkisi keletinin bildirip, kómektiń eldiń barlyq aımaǵyn qamtıtynyn jáne Sırııanyń turaqtylyǵyna úles qosatynyn aıtty. Sonymen qatar ol Qatardyń halyqaralyq seriktestermen úılesimdi túrde áreket etip, Sırııaǵa kómek kórsetý úshin jahandyq deńgeıde yntymaqtastyq ornatqanyn atap ótti.

– Qatardyń maqsaty – Sırııanyń qaıta qurylý úderisine úles qosý jáne eldiń qajettilikterin qamtamasyz etý. Biz AQSh-ty qosa alǵanda jahandyq seriktesterimizben qarym-qatynasymyzdy mańyzdy dep esepteımiz. Sırııa halqyna qoldaý kórsetý úshin atqaratyn rólimizdi úılestirý maqsatynda kún saıyn kelissóz júrgizemiz, – dedi ál-Ansarı.

Aıta keteıik, Sırııa Bashar Asad rejımi qulaǵannan keıin odan ári ýshyǵa túsken aýyr energetıkalyq daǵdarysty bastan keshirip jatyr. Eldiń jańa úkimeti bul daǵdarysty jeńildetý úshin ártúrli sharany qolǵa alyp jatyr.

Eske sala keteıik, buǵan deıin Iordanııa men Sırııa arasynda jańa kelisim jasalǵany týraly jazǵan bolatynbyz.