Qatar ınvestorlarynyń kelýimen elimizde zamanaýı jańa bank paıda bolady
ASTANA. KAZINFORM — QR Premer-Mınıstriniń orynbasary — Ulttyq ekonomıka mınıstri Nurlan Baıbazarov Qatar ınvestorlarynyń Bereke Bank-ti satyp alýy arqyly elimizdiń naryǵyna qandaı sharttarmen kiretini jaıynda túsinik berdi.
«Bank salasy qarqyndy básekede qyzmet etetini túsinikti. Óıtkeni olar ár klıent úshin básekege túsedi. Sondyqtan Qatar ınvestorlary bizge jańa tehnologııalarmen keledi. Kelissóz barysynda olar bank salasy qomaqty shyǵyndy qajet etetinin atap ótti. Sebebi qazir bul salaǵa joǵary tehnologııalar jyldam engizilip jatyr», — dedi N. Baıbazarov Parlament Májilisinde tilshiler suraǵyna jaýap bere otyryp.
Onyń aıtýynsha, qazir elimizde bank salasy IT-resýrstarǵa erekshe nazar aýdaryp otyr.
«Bereke Bank-tiń bolashaq aktsıonerleri bul salaǵa biraz qarajat salýy kerek. Sebebi bank zamanaýı tehnologııalardy engizbese, básekege túse almaıdy. Sondyqtan qatarlyq ınvestorlar osyny jaqsy túsinip otyr, ıaǵnı IT baǵytta qomaqty ınvestıtsııa salýy tıis. Meniń oıymsha, aldaǵy ýaqytta zamanaýı jańa bank paıda bolady. Olar klıentterdi tartý úshin biraz jeńildikter jasaıdy dep sanaımyn», — dedi mınıstr.
Eske salsaq, bıyl kóktemde qatarlyq Lesha Bank «Báıterek» ulttyq basqarýshy holdınginen Bereke Bank-ti satyp aldy.
Kelisimge 2024 jylǵy 31 naýryzda qol qoıylǵan. Mámile somasy 65 mlrd teńgeni quraǵan.
«Báıterek» holdıngi 2022 jyldyń qyrkúıeginde «Sberbank Qazaqstan» kompanııasynyń ıesi boldy. Keıinirek Sberbank ataýy Bereke Vank bolyp ózgerdi.
Sonymen qatar, búgin Májilistiń jalpy otyrysynda «Qazaqstan Úkimeti men Qatar Úkimeti arasyndaǵy basym salalardaǵy jobalardy damytý úshin uzaqmerzimdi strategııalyq áriptestik ornatý týraly kelisimdi ratıfıkatsııalaý týraly» zańy qabyldandy.
