Qatar HAMAS pen Izraıldiń kózqarastary toǵysa bastaǵanyn aıtty

ASTANA. KAZINFORM – Qatar Izraıl men palestınalyq radıkaldy HAMAS qozǵalysynyń Gaza sektorynda atysty toqtatý jónindegi kelisimge kelýine kúsh salyp jatyr, dep jazady reseılik TASS.

Bul týraly Qatardyń premer-mınıstri jáne osy eldiń Syrtqy ister mınıstri Mýhammed ben Abdel Rahman ál Tanı málim etti. Ol taraptardyń kózqarastary toǵysýǵa jaqyn ekenin aıtty.

- Beısenbi kúni biz taraptardyń atysty toqtatý boıynsha kelissózder aıasynda jaǵdaıdyń birshama oń baǵyt ala bastaǵanyn baıqadyq, - dedi ol.

SІM basshysynyń aıtýynsha, Qatar eki jaqtyń Gaza sektory boıynsha tatýlasýyna kúsh salyp keledi.

Bul týraly aıta kele ol HAMAS-tyń eger sharttar tolyq saqtalatyn bolsa qamaýǵa alynǵandardy aıyrbastaý úshin kepildegilerdiń bárin bosatýǵa daıyn ekenin jetkizdi. Alaıda Izraıl bul usynysqa kelispeýi múmkin.

Mınıstrdiń sózinshe, Izraıl Gazadaǵy soǵysty toqtatpaı-aq kepildegilerdiń bárin bosatqysy keledi.

15 qańtarda Izraıl men HAMAS anklavtaǵy atysty toqtatyp, Gazada kepilge alynǵan adamdardy bosatý týraly kelisken.

Úsh kezeńnen turatyn kelisim 19 qańtar kúni kúshine endi. Onyń birinshi bóligi 1 naýryz, senbi kúni aıaqtaldy.

Kelisimniń birinshi bóligin júzege asyrý barysynda taraptar atysty toqtatý týraly ekinshi kezeńniń sharttaryn kelisedi degen úmit bolǵan. Alaıda olaı bolmady.

18 naýryzda ásker Gaza sektoryndadaǵy anklavqa keń aýqymdy soqylar jasaı otyryp, soǵys áreketterine qaıta kóshti.

Izraıl premer-mınıstriniń keńsesi buny radıkaldy HAMAS qozǵalysynyń kelissózder barysynda deldal bolǵan AQSh-tyń arnaıy elshisi Stıv Ýıtkofftiń usynystaryn oryndaýdan bas tartýymen túsindirdi. Ol sektordaǵy basty maqsat kepildegi barlyq azamattardy bosatý bolǵanyn aıtty.

Radıkaldar bolsa soǵys áreketteriniń jandanýyna Izraıl men AQSh-ty kinálady.

Izraıl tarapynyń keıingi málimetteri boıynsha, HAMAS Gaza sektorynda áli 59 adamdy kepildikte ustap otyr.

Osyǵan deıin HAMAS-tyń kepilge alynǵandardy bosatyp, bes jylǵa tatýlasýǵa daıyn ekenin jazdyq.