Qatar Halyqaralyq azamattyq avıatsııa uıymyna resmı hat joldady

ASTANA. KAZINFORM — Qatar 9 qyrkúıekte Izraıldiń Doha qalasyna jasaǵan shabýylyna baılanysty Azamattyq avıatsııa jónindegi halyqaralyq uıymǵa (ICAO) resmı hat joldaǵanyn málimdedi, dep habarlaıdy Anadoly.

Gaza sektorynda bitim jáne tutqyndarmen almasý týraly kelissózderge deldal bolǵan Qatarǵa Izraıl armııasy áýeden soqqy jasap, 6 adam qaza tapqan edi. Osy oqıǵaǵa baılanysty Doha úkimeti halyqaralyq deńgeıde tıisti jumystar júrgizip jatyr.

Qatardyń resmı aqparat agenttigi QNA habarlaǵandaı, Doha úkimeti ICAO Keńesiniń tóraǵasyna resmı hat joldaǵan.

Uıymdaǵy Qatardyń turaqty ókili Isa Abdýlla ál-Malıkı joldaǵan hatta 9 qyrkúıektegi Izraıldiń shabýyly Qatardyń egemendigi men azamattyq avıatsııa jónindegi halyqaralyq Chıkago konventsııasynyń óreskel buzylýy ekeni aıtylǵan. Sonymen qatar, Qatar halyqaralyq quqyq aıasynda barlyq quqyqtaryn saqtap qalatynyn málimdegen.

Izraıldiń Qatarǵa jasaǵan shabýyly saldarynan 6 adam qaza tapty

9 qyrkúıekte Izraıl armııasy Doha qalasyndaǵy HAMAS-tyń kelissóz júrgizýshi delegatsııasy ornalasqan ǵımaratqa áýe shabýylyn jasaǵan.

Áýe soqqysynan keıin HAMAS jetekshileri aman qalǵanymen, 6 adam qaza tapty. Olardyń ishinde HAMAS Saıası bıýrosynyń múshesi Halıl ál-Haıeniń uly, HAMAS uıymynyń 4 múshesi jáne bir katarlyq polıtsııa qyzmetkeri bar.

10 qyrkúıekte Izraıl premer-mınıstri Bınıamın Netanıahý málimdeme jasap, Qatarǵa jańa shabýyldar bolatynyn eskertti.

— Nemese olardy elden shyǵarasyńdar, ne ádildikke tartasyńdar. Eger buny ózderiń istemeseńder, biz isteımiz, — dedi ol.

Buǵan deıin Qatar Izraıldiń Doha qalasyna jasaǵan soqqysyna qarsy áreket sharalaryn talqylaý úshin shuǵyl arab-ıslam sammıtin ótkizetini habarlandy.