Qatar, Germanııa, Qytaı: Qazaqstanǵa ınvestıtsııa salǵan elderdiń kóshin kim bastap tur

ASTANA. KAZINFORM – Syrtqy ister mınıstrligi Investıtsııa komıtetiniń tóraǵasy Ǵabıdolla Ospanqulov keıingi jyldary Qazaqstanǵa ınvestıtsııa salyp jatqan elderdiń alǵashqy kóshi qaı memleketter bastap turǵanyn aıtty.

- Qazir Arab elderi belsendi kirip jatyr. Mysaly, Qatar eli 18 mlrd dollar ınvestıtsııa baǵyttap otyr. Germanııa da jaqsy kirip jatyr. Qytaı bar. Ońtústik Koreıa úlken avtokólik zaýyttaryn salyp jatyr. Condaı-aq, AQSh, Reseı, Belgııa jáne Eýropanyń basqa elderi bar, - dedi ol Joǵarǵy sot uıymdastyrǵan ınvestıtsııalyq forým aldynda.

Komıtet basshysy sheteldik ınvestorlarǵa qyzyqty salalardy da atady.

- Bul birinshi – paıdaly qazbalar salasy. Óıtkeni elimizde paıdaly qazbalardyń úlken qory bar. Onyń ishinde sırek metaldar da. Ekinshi sala – logıstıka. Bul baǵytta Qazaqstannyń áleýeti óte úlken. Eýropa-Qytaı baǵytyn erekshe ataýǵa bolady. Biz osy dálizdi damytyp jatyrmyz. Osy jelimen mln tonnadan astam júk ótken. Odan keıin qaıta óńdeý salasy qyzyqty. Ózderińiz de baıqap júrgen shyǵarsyzdar, mashına jasaý salasynda ósim bar. KIA-nyń úlken zaýyty salynyp jatyr. Skoda markasynyń avtomobılderin qurastyratyn zaýyt Qostanaıda salynyp jatyr. Petropavl qalasynda Claas kompanııasy aýyl sharýashylyǵynyń úlken tehnıkasyn shyǵaratyn zaýyt qurylyp jatyr. Frantsııalyq kompanııa temirjol lokomotıvin shyǵaryp, eksportqa shyǵara bastady. Odan keıin aýyl sharýashylyǵyna, sonyń ishinde astyqty tereń óńdeýge qyzyǵýshylyq kóp, - dedi SІM ókili.

Eske salsaq, ótken aıda «Kazakh invest» ulttyq kompanııasy» AQ osy másele týraly arnaıy materıal jarııalaǵan edi. Onda tikeleı sheteldik ınvestıtsııa kólemi, eldegi ınvestıtsııalyq saıasatqa qatysty qalyptasqan jaǵdaı men oǵan áser etetin faktorlar týraly aıtylǵan.