Qatar Gazadaǵy atysty toqtatý úshin áli kúsh salyp keledi
ASTANA.KAZINFORM — Qatar memleketi Gaza sektoryndaǵy atysty toqtatýdy qamtamasyz etý úshin kúsh salýdy jalǵastyryp keledi. Qatar oq atýdy toqtatý rejımi saqtalsa, kelisimniń ekinshi kezeńine kóshýge múmkindik bar úmittenedi. Bul týraly Qatar Syrtqy ister mınıstrliginiń ókili Madjed ál-Ansarı málim etti, dep habarlaıdy Kazinform agenttiginiń menshikti tilshisi.
Kaırdegi Birlesken monıtorıng ortalyǵy arqyly jáne ártúrli deldaldar men seriktestermen úılestire otyryp, Qatar birinshi kúnnen bastap atysty toqtatý týraly kelisimniń oryndalýyn baqylap keledi.
— Gaza sektorynda atysty toqtatý rejıminiń kez kelgen buzylýy jerdegi turaqtylyqqa qater tóndirip, onyń tıimdiligin tómendetedi. Qıyn jaǵdaıǵa, beıbit turǵyndar arasyndaǵy qasaqana emes shyǵyndarǵa jáne kún saıyn bolyp jatqan oqıǵalarǵa qaramastan, qazirgi bitim soǵys bastalǵaly beri eń uzaq ýaqytqa sozyldy, — dedi Katar Syrtqy ister vedomstvosynyń ókili.
Onyń aıtýynsha, Gazadaǵy atysty toqtatý áli de kúshinde, al deldaldar endi kelisimniń ekinshi kezeńine baǵyttalýy kerek. Qazirgi ýaqytta Qatar seriktesterimen birlesip jumys istep jatyr.
— Qatar kelissózder ústelinde qaqtyǵystardy beıbit jolmen sheshýdiń turaqty saıasatyna súıene otyryp, seriktesterin árqashan qoldaıdy, — dedi Madjed ál-Ansarı.
10 qazanda túski ýaqytta Gaza sektoryndaǵy Izraıl men Palestına kúshteri arasyndaǵy atysty toqtatý týraly kelisim kúshine endi.
6 qazanda Izraıl men HAMAS arasyndaǵy kelissózderdiń birinshi kezeńi Mysyrda ótti.
AQSh prezıdenti Donald Tramp Izraıl men HAMAS Gaza kelisiminiń birinshi kezeńi boıynsha keliskenin jarııalady.