Qatar EQYU-nyń yntymaqtastyq jónindegi 12-seriktesi atandy
ASTANA. KAZINFORM – Qatar Eýropadaǵy qaýipsizdik jáne yntymaqtastyq uıymynyń (EQYU) yntymaqtastyq jónindegi 12-seriktesi mártebesin aldy. Bul sheshimdi uıymǵa múshe 57 memlekettiń barlyǵy qoldady, dep habarlaıdy Qatar News Agency agenttigi.
Tıisti sheshim 22 qazanda EQYU Syrtqy ister mınıstrleri keńesinde únsiz kelisim rásimi arqyly qabyldandy.
Osylaısha, Qatar Aýstralııa, Japonııa, Koreıa Respýblıkasy, Taıland jáne Aýǵanstanmen qatar uıymnyń Azııadaǵy altynshy seriktesi atandy.
EQYU-nyń qazirgi tóraǵasy, Shveıtsarııanyń Syrtqy ister mınıstri Inıatsıo Kassıs bul sheshimdi quptap, seriktestikti keńeıtý halyqaralyq dıalog pen qaýipsizdik salasyndaǵy yntymaqtastyqty nyǵaıtýǵa yqpal etetinin atap ótti.
Uıymnyń Bas hatshysy Ferıdýn Sınırlıoǵlý Qatardyń halyqaralyq deldaldyq jáne qaqtyǵystardy beıbit jolmen retteý salasyndaǵy tájirıbesine nazar aýdardy. Onyń aıtýynsha, Qatardyń qatysýy qaýipsizdikke qatysty ortaq syn-qaterlerdi talqylaýdy barynsha ınklıýzıvti ári tıimdi etýge múmkindik beredi.
Qatar ókilderi 2026 jylǵy 3–4 jeltoqsanda Shveıtsarııanyń Lýgano qalasynda ótetin EQYU Syrtqy ister mınıstrleri keńesiniń otyrysyna qatysady dep kútiledi.
EQYU Turaqty keńesiniń otyrysynda sóz sóılegen Qatardyń Aýstrııadaǵy elshisi ári Venadaǵy halyqaralyq uıymdar janyndaǵy turaqty ókili Djassım ıAkýb ál-Hammadı uıymǵa múshe memleketterge senim bildirgeni úshin alǵys aıtty.
Ol Qatardyń daýlardy beıbit jolmen sheshý jáne deldaldyq salasyndaǵy tájirıbesin óńirlik qaýipsizdik pen ekonomıka baǵytyndaǵy yntymaqtastyqty keńeıtý úshin paıdalanýǵa daıyn ekenin jetkizdi.
Aıta keteıik, yntymaqtastyq jónindegi seriktes mártebesi eldiń EQYU-ǵa múshe memleket retinde qosylǵanyn bildirmeıdi. Degenmen bul mártebe uıymnyń dıalogy men birlesken bastamalaryna qatysýǵa múmkindik beredi.
Eske sala ketsek, Quryltaıda EQYU Parlamenttik Assambleıasymen yntymaqtastyqty damytý perspektıvalary talqylanǵanyn jazdyq.
