Qatar Bishkektegi jańa aýrýhana qurylysyna 9,24 mln dollar bóledi

ASTANA. KAZINFORM — Qyrǵyzstan astanasy Bishkek qalasyndaǵy jańa aýrýhana korpýsyn Qatar qarjylandyrady, dep habarlaıdy Kabar.

Qyrǵyzstan prezıdenti Sadyr Japarov «Qyrǵyz Respýblıkasy Mınıstrler Kabıneti men Qatar memleketiniń Úkimeti arasyndaǵy Bishkek qalasyndaǵy Jedel medıtsınalyq járdem kórsetý klınıkalyq aýrýhanasyna qosymsha korpýs salý jónindegi granttyq kelisimdi ratıfıkatsııalaý týraly» zańǵa qol qoıdy. Atalǵan kelisim 2025 jylǵy 10 sáýirde Bishkek qalasynda qabyldanǵan bolatyn.

Bul zańdy Jogorký Kenesh 2025 jylǵy 25 qyrkúıekte qabyldady.

Granttyq kelisimniń maqsaty — Bishkektegi Jedel medıtsınalyq járdem kórsetý klınıkalyq aýrýhanasyna qosymsha korpýs salýǵa qarjylaı qoldaý kórsetý. Jańa ǵımarattyń qurylysy aýrýhananyń patsıentterge qyzmet kórsetý múmkindigin arttyryp, kórsetiletin medıtsınalyq kómektiń sapasyn jaqsartýǵa múmkindik beredi.

Grant somasy — 9 240 000 AQSh dollary. Bul qarajat jobanyń barlyq kezeńin qarjylandyrýǵa jumsalady. Atap aıtqanda, oǵan qurylys jumystary, qajetti qural-jabdyqtardy satyp alý, sondaı-aq jobany sátti júzege asyrý úshin qajet resýrstarmen qamtamasyz etý kiredi.

Osyǵan deıin Ózbekstan Qatarǵa qarsy oıyn kezinde ereje buzǵany úshin 340 myń dollar tóleıtini málim boldy.