Qatar Batys jaǵalaýdaǵy ızraıldik qonystanýshylardyń palestınalyqtarǵa shabýylyn aıyptady
ASTANA. KAZINFORM — Qatar okkýpatsııalanǵan Iordan ózeniniń Batys jaǵalaýyndaǵy palestınalyq beıbit turǵyndarǵa ızraıldik qonystanýshylardyń shabýyl jasaýyn aıyptap, halyqaralyq qaýymdastyqty palestınalyqtardy qorǵaý jáne kinálilerdi jaýapqa tartý úshin shara qabyldaýǵa shaqyrdy. Bul týraly Anadoly agenttigi jazdy.
Qatar Syrtqy ister mınıstrliginiń jazbasha málimdemesinde ızraıldik qonystanýshylardyń palestınalyq beıbit turǵyndarǵa, sonyń ishinde júıeli túrde shabýyl jasaýy halyqaralyq quqyq pen halyqaralyq zańdylyq qaǵıdattaryna qaıshy keletini aıtylǵan.
Málimdemede bul shabýyldar palestınalyqtarǵa qarsy jasalyp jatqan aýyr qylmystardyń jalǵasy ekeni atap ótildi.
Sondaı-aq Izraıl úkimeti armııa men qaýipsizdik kúshteriniń qorǵaýyndaǵy qonystanýshylardyń shabýyldaryn kúsheıtýge jaǵdaı jasap otyrǵany aıtylǵan.
Qatar halyqaralyq qaýymdastyqty palestınalyqtardy qorǵaý jáne kinálilerdi jaýapqa tartý úshin shuǵyl shara qabyldaýǵa shaqyrdy.
Málimdemede Qatardyń Palestına máselesine qatysty ustanymy ózgermegeni atap ótildi. Doha palestınalyqtardyń zańdy quqyqtaryn qorǵaýdy jáne astanasy Shyǵys Ierýsalım bolatyn, 1967 jylǵy shekaralar negizinde táýelsiz Palestına memleketin qurýdy qoldaıtynyn málimdedi.
Aıta keteıik, jaqynda Qazaqstannyń halal sertıfıkaty Qatarda resmı tanyldy.
